Lokun milli Skógaráss og Brekkuáss skipulagi samkvæmt

Á fundi umhverfis- og framkvæmdaráðs Hafnarfjarðar þann 29. maí sl. voru umferðarmál í Áslandi 3 og 4 tekin fyrir til umræðu ný. Ákvað ráðið að draga til baka ákvörðun ráðsins frá fundi 13. maí sl. um áframhaldandi lokun milli Vörðuáss og Skógaráss. Opnað verður því á ný fyrir umferð milli Vörðuáss og Skógaráss eins og samþykkt skipulag hljóðar upp á. Lokun á milli Brekkuáss og Skógaráss var nýtt sem tímabundin lausn á meðan á uppbyggingu innviða fyrir svæðið stóð.

Skógarás er hluti af gatnakerfi Áslands 4

Í samþykktu skipulagi fyrir Ásland 4 er Skógarás hluti af því hverfi og tengist þar með við gatnakerfi þess. Þar sem nú er búið að malbika þær götur sem tengja Skógarás við Ásvallabraut sem lið í uppbyggingu gatnahverfis í Áslandi 4 mun lokun nú eiga sér stað á milli Brekkuáss og Skógaráss og samhliða opnað fyrir umferð milli Vörðuáss og Skógaráss. Í tengslum við þessar lokanir er verið að gera nýjan snúningshaus í enda Skógaráss og eru þær framkvæmdir að hefjast. Eftir lokunina munu íbúar Skógaráss fara um Vörðuás og þannig niður á Ásvallabraut. Skilti eru sett upp til áminningar við Brekkuás og Ásvallabraut.

Náttúruperla í suðurhlíðum Ásfjalls

Ásland 4 er nýjasta uppbyggingarsvæðið í Hafnarfirði, íbúðahverfi sem kemur í framhaldi af hverfum beggja vegna, þ.e. Ásland 3 og nýjum íbúðahverfum í Skarðshlíð og Hamranesi.  Svæðið markast af Ásfjalli með Mógrafarhæð sem stingst inn í svæðið frá norðri, íbúðarbyggð Áslands 3 í norðaustri, Ásvallabraut í austri og suðri og nýrri íbúðabyggð í Skarðshlíð og Hamranesi í vestri.