Lúðrarsveitin fær árlegan styrk
Lúðrasveit Hafnarfjarðarbæjar fær eina milljón króna árlega í styrk frá bænum næstu fimm árin. Markmiðið er að styðja við reglubundna starfsemi sveitarinnar og efla lúðrasveitastarf og menningarlíf í Hafnarfirði. Bæjarstjóri og formaður lúðrasveitarinnar rituðu undir samninginn að sveitinni viðstaddri og tók hún lagið. Stemningin var afar góð.
„Þetta breytir öllu. Styrkurinn veitir okkur fyrirsjáanleika,“ segir Finnbogi Óskarsson, gjaldkeri sveitarinnar. „Hann þýðir að við getum tekið meiri áhættu og hugsað stærra en við höfum þorað. Við erum virkilega ánægð með það,“ segir hann.
Mikilvæg menningarlífinu
Valdimar Víðisson bæjarstjóri fagnar því að búið sé að formgera stuðning til Lúðrasveitar Hafnarfjarðar með þessum hætti. „Lúðrasveitin er mikilvægur hluti af menningarlífi okkar. Lúðrasveitarhefðin í Hafnarfirði er löng og merkileg. Með þessum samningi styrkjum við þá arfleið.“
Finnbogi segir að síðast þegar sveitin fékk þriggja ára styrk, sem var fyrir Covid, hafi hún til að mynda haldið tónleika með Pollapönki.
„Venjulega kaupum við tilbúnar nótur fyrir um 400 þúsund á ári eða um 10-15 þúsund fyrir hvert lag, og höldumokkar tónleika. En með styrknum getum við látið útsetja heilt prógramm. Það kostaði rúmar tvær milljónir fyrir Pollapönks-tónleikana og með svona styrk höfum við efni á því að ráða einhvern til að útsetja fyrir okkur sérstaklega,“ segir Finnbogi.
Um 45 í lúðrarsveitinni
Um 45 æfa reglulega með lúðrasveitinni sem hittist einu sinni í viku. „Við æfum í Tónkvísl sem er hluti af Tónlistarskólanum. Fluttum þar inn upp úr aldamótum og erum í góðri sambúð við Tónlistarskólann,“ segir hann. Félagsmenn séu nú frá tvítugu á áttræðisaldur.
„Við fylgdum aldursforseta okkar til grafar fyrir mánuði, 78 ára. Með okkur eru menn yfir sjötugu og séu menn við góða heilsu er alltaf hægt að spila,“ segir hann. Frábært sé að geta gengið í lúðrasveitina eftir útskrift úr tónlistarskólanum og haldið áfram að njóta tónlistar. „Já, það er hægt að halda áfram að spila á meðan maður dregur andann.“
En það er enginn styrkur án skuldbindinga! Lúðrasveitin mun halda úti reglubundnum æfingum og virku lúðrasveitarstarfi á samningstímanum. Hún mun koma fram á viðburðum á vegum Hafnarfjarðarbæjar eða í samstarfi við menningar- og ferðamálanefndar bæjarins. Verkefnin eru mörg þótt meginþorrinn þekki Lúðrasveitina helst úr skrúðgöngunni á þjóðhátíðardaginn.
„Já, 17. júní væri tómlegur án lúðrasveitar,“ segir Finnbogi. „700 börn eru í tónlistarskólanum og þau eru öll að læra eitthvað. Mörg á blásturshljóðfæri og í lúðrasveit. Það væri leiðinlegt hefði fólk engan vettvang til að halda áfram að spila þegar þau útskrifast úr skólanum. Þetta er frábær áhugamál.“
Til lukku öll. Við munum njóta.
Löng saga lúðrarsveitarinnar
Lúðrasveitin á sér langa sögu hér í Hafnarfirði. Fyrst var stofnað til lúðrablásturs í Hafnarfirði árið 1890. Starfsemin var stopul fyrstu árin og, eins og lýst er á síðu sveitarinnar, aflagðist lúðurleikur að fullu árið 1895 og hélst þannig til ársins 1908.
„Það ár barst bæjarstjórn Hafnarfjarðar að gjöf nokkrir gamlir lúðrar og að viðbættum 30 kr. styrk voru gamlar lúðurdruslur upp gerðar og stofnað til nýrrar lúðrasveitar 23. nóvember 1909. Sú sveit lagði upp laupana árið 1912.“ Nokkrar tilraunir voru svo gerðar þar til Lúðrasveit Hafnarfjarðar var stofnuð í janúar 1950
