Magnús Kjartansson fær fjórða hjartasteininn

 Hjartasteinn í hjarta Hafnarfjarðar!

Það var svo sannarlega hátíðarstund þegar Magnús Kjartansson tónlistarmaður fékk sinn hjartastein við Bæjarbíó. Steinninn er sá fjórði sem settur er í stéttina fyrir framan þetta einstaka tónlistarhús í hjarta Hafnarfjarðar.

Þótt Magnús sé borinn og barnfæddur Keflvíkingur eiga Hafnfirðingar mikið í honum líka. Hann bjó í Hafnarfirði í 33 ár áður en hann flutti ásamt konu sinni í Grímsnesið. Þar hafa þau búið í rúman áratug.

Magnús iðinn og dáður tónlistarmaður

Magnús var viðriðinn upptökur, útsetningar, hljóðfæraleik og upptökustjórn á mörgum af þekktustu lögum 8. 9. og 10. áratug síðustu aldar – einmitt á þeim tíma sem hann og fjölskylda hans bjuggu í Hafnarfirði. Má þar nefna Brimkló, HLH flokkinn, Halla og Ladda, Brunaliðið, Vilhjálm Vilhjálmsson, Geirmund Valtýsson, auk fjölda annarra verkefna sem unnin voru í Hljóðrita í Hafnarfirði að mestu. Einnig samdi hann á þeim tíma sem hann bjó í firðinum mörg af sínum þekktustu lögum.

Magnús sá fjórði sem meitlaður er í stein

Magnús Kjartansson er fjórði listamaðurinn sem hlýtur hjartasteininn í hjarta Hafnarfjarðar. Fyrir eru hjartasteinar til heiðurs Björgvini Halldórssyni, tónlistarmanni og bæjarlistarmanni Hafnarfjarðar 2018, Þórhalli Sigurðssyni, Ladda leikara og tónlistarmanni, og þá er hjartasteinn í minningu Guðrúnar Helgadóttur rithöfundar.

Í tilefni þessa heiðurs efnir Magnús Kjartansson ásamt Vintage Caravan, auk sinnar eigin hljómsveitar, til tónleika í Bæjarbíói þann 21. september næstkomandi.

Við óskum Magnúsi hjartanlega til hamingju!