Mamma mína! á svið í Víðistaðaskóla

Öll á bakvið sýninguna

Einskær leikgleði mun skína úr hverju andliti nemenda 10. bekkjar Víðistaðaskóla á föstudag þegar þeir frumsýna söngleikinn Mamma Mía. Nærri fimmtíu manna leikhópur stendur á sviði. Önnur fjörutíu sinna stuðningshlutverkum. Öllu er tjaldað til. Foreldrar, kennarar og nemendur hafa öll lagt sitt á mörgum við að sauma búninga og smíða leikmynd.

Sýningarnar standa dagana 13.-15. febrúar og eru fimm. Uppselt er á tvær og hver að verða síðastur að tryggja sér miða. Verð almennt 3.200 krónur en 1.700 fyrir 7. bekk og yngri.

• Nálgast má miða hér

„Það gengur vel. Fullt af vinnu er í gangi,“ segir Úlfhildur Harne Örnólfsdóttir, leikstjóri sýningarinnar. „Við fengum sviðið og salinn afhentan á mánudag og nú eru allar hendur á fullu. Mikið að gera. Nú gerast leikhúskraftaverkin,“ segir hún. „Þetta er að verða raunverulegt. Ljósin lýsa þau upp og þau eru að fara að sýna. Spenna, tilhlökkun og þau fyllast að innan af glimmeri.“„Þau verða 49 á sviði en árgangurinn sjálfur er stærri. Þau eru um 90 og koma öll að sýningunni á einn eða annan hátt. Það eru svo mörg hlutverkin þegar kemur að svona uppsetningu. Þau vinna í sviðsmynd, búningum, markaðsmálum. Það er fullt af verkefnum og öll taka þau þátt.“

Nemendurnir fjármagna útskriftarferð sína í Þórsmörk í vor með sýningunni. Söngleikurinn er líka hluti af list- og verkgreinanámi þeirra. Úlfhildur hvetur fólk til að hafa hraðar hendur og tryggja sér miða. „Síðast þegar ég vissi var 70% miðanna seldir.“

Hún lýsir því hvernig risastór danshópur og kór séu stóran hluta sýningarinnar á sviðinu. „Þar að auki eru foreldrarnir búnir að vera svo rosalega virkir. Búnir að vera hér frá því í byrjun janúar að smíða, sauma, græja og gera.“

Fréttastofa Sýnar heimsótti hópinn í undirbúningnum. Þar sýndu krakkarnir nokkur spor úr sýningunni.

• Sjáðu frétt Sýnar hér

Svo líður helgin með sínum ævintýrum. Úlfhildur segir að hún hafi þegar rætt við krakkana hversu skrítin tilfinningin verði eftir helgi. „Mánudagurinn verður næs; að eiga frí um kvöldið. En fljótt  munu þau velta fyrir sér hvað þau eigi að gera við allan tímann sinn! Þetta er búið að taka svo mikinn tíma í langan tíma. Það verða viðbrigði fyrir þau öll,“ segir Úlfhildur full tilhlökkunar fyrir uppskerunni.