Byggðasafn

Sýningar

Byggðasafnið er lifandi og fróðlegt safn fyrir alla fjölskylduna. Sýningar eru á sjö stöðum.

• Pakkhúsið er almennt með þrjár sýningar í gangi í einu: Fastasýningu um sögu bæjarins, leikfangasýningu og þemasýningu.
• Sívertsen-húsið er elsta hús Hafnarfjarðar, byggt á árunum 1803–1805 af Bjarna Sívertsen. Þar er sýnt hvernig yfirstéttarfjölskylda í Hafnarfirði bjó í byrjun 19. aldar. Einnig er varpað ljósi á merkilega sögu Bjarna og fjölskyldu hans.
• Siggubær er varðveittur sem sýnishorn af heimili verkamanns og sjómanns í Hafnarfirði frá fyrri hluta 20. aldar. Þannig er hægt að upplifa hvernig alþýðufólk í bænum bjó á þeim tíma.
• Bookless Bungalow við Vesturgötu hefur að geyma sýningu um tímabil erlendu útgerðanna í Hafnarfirði á fyrri hluta 20. aldar. Þar má einnig sjá stássstofu Bookless-bræðra.
• Beggubúð var byggð árið 1906 og stóð húsið áður við aðalverslunargötu bæjarins. Nú er þar verslunarminjasafn.
• Gúttó eða Góðtemplarahúsið, byggt árið 1886, var fyrsta eiginlega samkomuhús Hafnfirðinga og um langan tíma miðstöð allrar menningar í bænum.
• Strandstígurinn meðfram höfninni í Hafnarfirði býður upp á ljósmyndasýningar sem varpa ljósi á dagleg störf og sögu fólksins sem byggði bæinn.

Í fyrsta viðtali Vitans, hlaðvarpi Hafnarfjarðarbæjar er rætt við Björn Pétursson bæjarminjavörð. Viðtalið er tekið upp í Bookless Bungalow þar sem Björn segir frá starfsemi safnsins, sögu bæjarins og skemmtilegar sögur, meðal annars af draugagangi og atkvæðasmölun Siggu í Siggubæ. Þátturinn var tekinn upp í ágúst 2019.