Menntastefna í mótun – vinnu lýkur á vormánuðum

Unnið hefur verið að gerð menntastefnu Hafnarfjarðar undanfarin misseri en vinnu við gerð menntastefnunnar var formlega ýtt úr vör haustið 2019. Heimsfaraldur hefur haft sín áhrif á framvindu mála og hraða vinnunnar enda hafa menntaleiðtogar, sem eru fulltrúar allra skóla, og aðrir haft í nógu að snúast. Með hækkandi sól og engum takmörkunum eru menntaleiðtogar farnir að funda aftur reglulega á staðarfundum og vinna við menntastefnuna fengið byr undir seglin á ný. Menntaleiðtogarnir hafa lagt metnað og alúð í að leggja fagleg sjónarmið á vogarskálar menntastefnu og öflug og góð samvinna við skólasamfélagið hefur aukið virði hennar og innihald. 

Þroski, vellíðan og árangur í námi í fyrirrúmi

Menntastefnan verður vegvísir í átt að þeim markmiðum sem sett eru í samvinnu við nemendur, kennara, starfsfólk og foreldra og liggur hugmyndafræði lærdómssamfélagsins til grundvallar við mótun. Skólasamfélagið, nemendur, kennarar og foreldrar hafa fengið tækifæri til þátttöku í gegnum netkannanir þannig að raddir þeirra og sjónarmið heyrist og sjáist í menntastefnunni. Áfram er opið fyrir skráningu hugmynda í gegnum Betri Hafnarfjörð – samráðsgátt bæjarins og mögulegt að koma ábendingum og sjónarmiðum á framfæri.

Með nýrri menntastefnu verða áherslur gerðar skýrar og tengd markmiðum sem stefnt er að í skólastarfinu þar sem þroski, vellíðan og árangur í námi er í fyrirrúmi. Gert er ráð fyrir að vinnu við menntastefnu ljúki vorið 2022.