Metnaðarfullur handverksbakari

Gulli Arnar bakarameistari hefur rekið samnefnt handverksbakarí við Flatahraun 31 í tæp tvö ár. Gulli er afar kraftmikill og metnaðarfullur ungur maður sem kom með ferskan blæ inn í flóru bakaría í Hafnarfirði, þar á meðal margar nýjungar sem ekki höfðu verið fáanlegar áður í bænum. Hjá handverksbakaríinu er passað vel upp á að fyrirbyggja matarsóun og eru stefna og markmið með rekstrinum að selja allar vörur upp daglega og framleiða nýjar og ferskar næsta dag.

Stækkun sem opnar á enn meiri tækifæri, betri þjónustu og úrval 

Í febrúar síðastliðnum stækkaði bakaríið í sama húsnæði sem gerði Gulla kleift að bjóða upp á enn betri þjónustu og úrval. Hann framleiðir hágæða vörur frá grunni úr fyrsta flokks hráefni og leggur áherslu á gæði fram yfir magn. Framleiðslan fer fram í opnu, björtu eldhúsi með stórum gluggum þar sem almenningur getur fylgst með. Á námsferli sínum sigraði Gulli í árlegri keppni bakaranema tvisvar sinnum og varð jafnframt fyrstur til að sigra keppnina tvö ár í röð. Við útskrift var hann verðlaunaður af skólanum fyrir framúrskarandi árangur í verklegu námi og á sveinsprófi. Gulli lærði kökugerð við hið sögufræga Konditori La Glace í Kaupmannahöfn. Gulli fékk sl. vor viðurkenningu Markaðsstofu Hafnarfjarðar fyrir starfsemi í þágu eflingar atvinnulífs og bæjaranda í Hafnarfirði. Hann er einn þeirra söluaðila sem stóðu vaktina í fallegu jólahúsi allar helgar í Jólaþorpinu þetta árið.  

Jólablað Hafnarfjarðar 2021

Þessi umfjöllun er hluti af efni í jólablaði Hafnarfjarðar 2021. Jólablaðið hefur þann eina og sanna tilgang að kynna jólabæinn Hafnarfjörð fyrir öllum áhugasömum, fyrir gestum og gangandi og varpa ljósi á þann hlýleika og fjölbreytileika sem býr með fólkinu og fyrirtækjunum í jólabænum Hafnarfirði. Í jólablaðinu 2021 er meðal annars að finna umfjöllun um öðruvísi skemmtun, hefðir í hreyfingu, einstaka samheldni íbúa, hús tækifæranna í Hellisgerði, fjölskyldurekin fyrirtæki, norðurljós, töfrum prýdd kaffihús, girnilegar uppskriftir, mikilvægi þess að njóta og slaka, Jólahjartað og hjartasvellið sem opnar í desember, samstarfsverkefni samfélaginu til heilla og síðasta en ekki síst Jólaþorpið sem opnaði fyrstu helgina í aðventu.

Jólablað Hafnarfjarðar 2021