Styrkir úr minningarsjóði

Úthlutun styrkja úr Minningarsjóði Helgu og Bjarna

Þann 8. mars voru styrkir veittir úr Minningarsjóði Helgu og Bjarna við hátíðlega athöfn í Hásölum, safnaðarheimili Hafnarfjarðarkirkju, á afmælisdegi Bjarna Snæbjörnssonar. Magnús Snæbjörnsson afhenti styrkina fyrir hönd stjórnar Minningarsjóðsins, en Magnús skipar stjórn sjóðsins ásamt séra Jóni Helga Þórarinssyni og Rósu Guðbjartsdóttur.

Að þessu sinni hlutu þrjú verkefni styrki. Bjartey Sigurðardóttir og Ásthildur Snorradóttir hlutu 500 þúsund kr. styrk, til að þróa smáforritið Orðagull sem hefur það markmið að efla orðaforða, vinnsluminni, heyrnræna úrvinnslu og máltjáningu. Samstarfshópur sem stendur fyrir heimanámsaðstoð fyrir nemendur af erlendum uppruna fékk 450 þúsund krónur og íþróttafélagið Fjörður 500 þúsund krónur til að efla íþróttaskóla félagsins.

Minningarsjóður Helgu og Bjarna hefur starfað frá árinu 2006 og hlutverk sjóðsins er að styðja við og efla einstaklinga, fyrirtæki eða opinbera aðila í Hafnarfirði sem veita börnum, sem glíma við hvers konar erfiðleika, þjónustu og aðstoð. Frá stofnun sjóðsins hafa 27 verkefni fengið styrkveitingar. Er það von fjölskyldu Helgu og Bjarna að styrkirnir verði til að efla enn frekar það góða og gefandi starf styrkþega í garð hafnfirskrar æsku. 

Frekari upplýsingar veitir Magnús Snæbjörnsson, formaður Sjóðsstjórnar: magnuss@simnet.is