Músíkmeðferð fyrir börn og ungmenni

Músíkmeðferð fyrir börn og ungmenni með margvíslegan vanda

Núverið undirrituðu Hafnarfjarðarbær og Hljóma músíkmeðferð samstarfssamning um músíkmeðferð fyrir börn og ungmenni í Hafnarfirði. Hljóma, undir stjórn Ingu Bjarkar Ingadóttur, veitir músíkmeðferð fyrir börn og ungmenni með margvíslegan vanda, svo sem andlega eða líkamlega fötlun, geðrænan vanda, áföll, félagslegar aðstæður og tilfinningalegan vanda.

^{Þessi tæplega fimm ára drengur er meðal nemenda Ingu Bjarkar. Ljósmynd: Olga Björt Þórðardóttir.}

Nýsköpun í þróun meðferða fyrir einstakan og fjölbreyttan hóp skjólstæðinga

Í Hljómu fá einstaklingar tækifæri til að nálgast og njóta tónlistar með öllum sínum eflandi eiginleikum á eigin forsendum. Hljómu er að finna í fallegu svörtu timburhúsi við Austurgötu 38 í Hafnarfirði og er þar aðstaða til músikmeðferðar og tónlistarkennslu fyrir einstaklinga og hópa með góðu aðgengi fyrir hreyfihamlaða. Eigandi Hljómu, Inga Björk Ingadóttir, nam músíkmeðferð við Musiktherapeutische Arbeitsstätte í Berlín á árunum 2001 – 2006 og í kjölfarið starfaði hún við músíkmeðferð og sértæka tónlistarkennslu í Þýskalandi og Austurríki á hinum ýmsu stofnunum, bæði á heilbrigðis – og uppeldissviði. Þar vann hún meðal annars með börnum með sérþarfir, á sjúkrahúsi sérhæfðu í krabbameinslækningum við líknandi meðferð og með fjölfötluðum einstaklingum.

^{Hljóðfærakostur og aðstaða í Hljómu er í stöðugri uppbyggingu. Auk hefðbundinna hljóðfæra er þar að finna fjölbreytt safn hljóðfæra sem Inga Björk hefur eignast á starfsferli sínum erlendis og hér heima, sérsmíðað sjálf og látið sérsmíða fyrir Hljómu. Þetta eru m.a. hljóðfæri sérsniðin að þörfum ólíkra skjólstæðinga með mismunandi áskoranir. Ljósmynd: Olga Björt Þórðardóttir}

Hljóma er einstakur staður í hjarta Hafnarfjarðar

Frá árinu 2011 hefur Inga Björk starfað á Íslandi við músíkmeðferð og tónlistarkennslu og árið 2014 stofnaði Inga Hljómu. Hún hefur hin síðustu ár lagt mikla áherslu á að færa tónlist og tækifæri til þeirra sem þurfa aðlagaða nálgun og kennslu og vinnur í gegnum fyrirtæki sitt, bæði á staðnum og heimilum. Hún vinnur m.a. með börnum og ungmennum með ýmis konar áskoranir og einnig fullorðnum með heilabilun auk þess að sinna nýsköpun í tónlistarkennslu allra yngsta fólksins. Ásamt starfi sínu í Hljómu sinnir Inga Björk sértækri tónlistarkennslu og ráðgjöf meðal annars í Tónlistarskóla Hafnarfjarðar. Samstarfsamningur milli Hljómu og Hafnarfjarðarbæjar er tilraunaverkefni til eins árs með möguleika á framlengingu og áframhaldandi farsælu og góðu samstarfi til frambúðar.

^{Útsýnið úr glugga Hljómu er ævintýri líkast. Ljósmynd: Olga Björt Þórðardóttir}