Notaleg jólastemning í Hafnarborg

Aldís Arnardóttir, forstöðumaður Hafnarborgar, menningar- og listamiðstöðvar Hafnarfjarðar , segir að vel sé tekið á móti gestum á aðventunni í safninu. Þar eru í boði sýningar, tónleikar og jóladagatal fyrir fjölskyldur. 

Aldís bendir á að jóladagatal Sjónvarpsins, Hvar er Völundur?, frá árinu 1996 verði sýnt í endurtekningu alla daga, nema þriðjudaga, milli kl. 16 og 17. „Í aðalsal safnsins erum við með yfirlitssýningu á verkum Þorvaldar heitins Þorsteinssonar, myndlistarmanns, sem nefnist Lengi skal manninn reyna, en jóladagatalið er einmitt eftir hann og gefur mynd af fjölbreyttu höfundarverki Þorvaldar,“ segir Aldís. Það eru Felix Bergsson og Gunnar Helgason sem fara með aðalhlutverk og leikstjórn þáttanna. „Við vonum að barnafjölskyldur komi til okkar að fylgjast með þáttunum en sá fyrsti var sýndur 1. desember. Safnið er alltaf lokað á þriðjudögum og þess vegna sýnum við tvo þætti á miðvikudögum. Þá er ókeypis inn í safnið, hvort sem það er á sýningar eða viðburði,“ bætir hún við.

Notalegt að koma inn í rólegheitin í Hafnarborg 

Í Hafnarborg er því hægt að eiga notalega stund, slaka á og skoða myndlist, bækur eða fallegar gjafavörur í safnbúðinni. Gott er að koma inn í rólegheitin eftir að hafa gengið um jólaþorpið og anda að sér jólastemningu utandyra á Strandgötunni í Hafnarfirði. Einnig er boðið upp á kaffi á vinnustofu listamannsins, „Þorvaldsstofu“, sem sett hefur verið upp á annarri hæð safnsins. Er þar hægt að skoða skissur og annað efni frá honum í þeirri kyrrð og næði sem einkenna safnið. Nú stendur yfir sýning á verkum Þorvalds Þorsteinssonar í Hafnarborg en margir hafa lagt leið sína þangað til að berja sýninguna augum. 

Sýningin Söngfuglar með nýjum verkum eftir Katrínu Elvarsdóttur

Auk sýningar Þorvaldar Þorsteinssonar er svo í gangi sýningin Söngfuglar þar sem sjá má ný verk eftir Katrínu Elvarsdóttur. Á dagskránni verða einnig hádegistónleikar með jólablæ 7. desember kl. 12 og síðdegistónar þann 17. desember kl. 18, þar sem gestir geta notið þess að hlusta á jóladjass. „Tónleikar safnsins eru ávallt vel sóttir en þetta er átjánda árið sem við í Hafnarborg erum með hádegistónleika á aðventu. Undanfarið hefur sömuleiðis verið mjög góð aðsókn í safnið og greinilegt að sýningarnar höfða til margra. Til dæmis hafa fjölmargir nemendahópar, jafnt úr grunn- og framhaldsskólum komið í heimsókn. Nú þegar hafa komið 180 nemendur á einum mánuði og við eigum von á rúmlega hundrað í viðbót á næstu tveimur vikum,“ segir Aldís. „Okkur finnst alltaf mjög skemmtilegt að taka á móti þessum áhugasömu hópum.“

Áhugi fólks á jólabænum skilar sér líka í Hafnarborg 

Aldís segir að nú sé margt um að vera í Hafnarfirði, bærinn sé fallega skreyttur og jólaþorpið alltaf vinsælt. „Áhugi fólks á bæjarbragnum hér fyrir jólin skilar sér líka til okkar. Hingað koma börn sem eru að taka þátt í jólaratleik og svo er alltaf áhugi á vörum sem við erum með í sölu á aðventunni. Þar má sérstaklega nefna Kærleikskúluna og Jólaóróann sem við seljum fyrir Styrktarfélag lamaðra og fatlaðra. Einnig erum við ávallt með vandaðar listaverkabækur og nýju Hafnarfjarðarveggspjöldin frá Hjarta Reykjavíkur eru væntanleg í sölu. Þá erum við búin að skreyta fallega fyrir hátíðina, þannig að umhverfið er orðið jólalegt hjá okkur.“

Aðgangur að tónleikum, sýningum og viðburðum þeim tengdum er ókeypis og allir hjartanlega velkomnir í Hafnarborg, Strandgötu 34. Opið alla daga, nema þriðjudaga, kl. 12-17.

Kynning birtist í Fréttablaðinu 4. desember 2021