Nýtt skipulag í Skarðshlíð

Bæjarráð, í umboði bæjarstjórnar, samþykkti á fundi sínum í morgun, skipulag lóða í Skarðshlíð, fyrir þriggja til fimm hæða fjölbýlishús og að óskað verði eftir tilboðum í þær. Nýtt deiliskipulag gerir ráð fyrir 26 fjöleignarhúsum með 231 íbúð, meðal annars hentugum íbúðum fyrir barnafjölskyldur. Þar af er gert ráð fyrir að Alþýðusamband Íslands fái lóð fyrir 32 leiguíbúðir.

Eitt glæsilegasta byggingarland höfuðborgarsvæðisins

Bæjarstjórn Hafnarfjarðar samþykkti á fundi sínum í júní að auglýsa tillögur að breytingu á aðalskipulagi Hafnarfjarðar 2013-2025 hvað varðar ákveðið svæði í Skarðshlíðarhverfi. Engar athugasemdir bárust og voru breytingar á skipulagi afgreiddar í dag hjá bæjarráði. Breyting felur í sér að hluti svæðisins, samfélagsþjónusta, breytist í íbúðasvæði og sá hluti sem ætlaður var heilsugæslu,  hjúkrunarheimili, skóla og leikskóla, verður skóli og leikskóli.  Svæðið sem breytingin nær til er austan Hádegisskarðs milli Hraunskarðs og Apalskarðs. Samhliða var auglýst breyting á deiliskipulagi Skarðshlíðarhverfis sem felur í sér að svæði fyrir íbúðabyggð er stækkað inn á svæði ætlað samfélagsþjónustu, byggð ætluð fjölbýlishúsum stækkuð og fyrirkomulagi þeirra og skilmálum breytt. Við endurskoðun á skipulagi og í hönnun og uppbyggingu á svæðinu var áhersla lögð á heildræna sýn, vistvænt skipulag, grænt yfirbragð og fjölbreytt útisvæði.

„Miklar breytingar hafa átt sér stað síðastliðin ár hvað varðar uppbyggingu úthverfa. Breytingar í efnahagsmálum og samfélagsbreytingar hafa verið að kalla á endurhugsun í byggðaþróun með tilheyrandi breytingum á skipulagi innan sveitarfélaga. Íbúum á Völlum í Hafnarfirði hefur fjölgað mikið hin síðustu ár sem segir mikið um vinsældir svæðisins. Stutt er í alla þjónustu, aðgengi greitt og náttúruperlur rétt handan við hornið. Mikil fólksfjölgun kallar á uppbyggingu og viljum við með þessum skipulagsbreytingum á Skarðshlíðarsvæði stækka til muna það svæði sem ætlað er fyrir íbúðir og opna þannig á framtíðarbúsetu í fallegu hverfi fyrir fleiri fjölskyldur og einstaklinga“ segir Haraldur L. Haraldsson, bæjarstjóri Hafnarfjarðarbæjar.

Fjölbýlishúsalóðir verða þungamiðja hverfisins

Skarðshlíðarhverfi er um 30 ha að stærð og liggur það upp að hlíðinni sunnan og vestan í Ásfjalli. Hlíðin hallar mót suðri og er því skjól fyrir norðan- og austanáttum. Á næstunni, eftir að nýsamþykkt skipulag hefur verið birt formlega, verður auglýst eftir tilboðum í allt að sjö fjölbýlishúsalóðir á svæðinu.  Annað svæði ofar í hlíðinni er í hönnunar- og skipulagsferli en það er ætlað einbýlis-, par- og raðhúsum.  Í hönnun Skarðshlíðarhverfisins í heild er leitast við að hafa sjálfbæra þróun og vistvænt skipulag að leiðarljósi og skapa þannig eftirsóknarvert búsetuumhverfi. Fjölbýlishúsin verða þungamiðja hverfisins og mun byggðin svo greinast upp í hlíðina með rað- og parhúsum neðst en einbýlishúsum ofar þar sem landhalli er meiri. 

Á Völlunum búa í dag í kringum 5.500 einstaklingar sem flestir eru á aldrinum 21-40 ára.