Ný skammtímadvöl fyrir fötluð börn

Börnin fá tilbreytingu tækifæri utan heimilis

„Þessi nýja skammtímadvöl hér í Svöluhrauni er þörf viðót við þau úrræði sem þegar eru til staðar. Það er því óhætt að segja að stundin sé stór fyrir samfélagið okkar og öll þau sem starfa við og brenna fyrir því verkefni að tryggja velferð barna okkar og þeirra sem mest þurfa á stuðningi að halda,“ sagði Sigurður Nordal, sviðstjóri stjórnsýslu og staðgengill bæjarstjóra þegar nýja skammtímadvölin að Svöluhrauni var formlega opnuð í vikunni.

Sigurður mætti í stað Rósu sem jafnaði sig eftir aðgerð á hönd eftir að hafa tvíbrotnað í hálkuslysi. Rósa mætti svo í dag færandi hendi og fagnaði áfanganum með starfsfólki.

Guðrún Halldórsdóttir forstöðumaður og Rósa Guðbjartsdóttir bæjarstjóri.

Fjögur börn eru í skammtímadvölinni hverju sinni og er dvalartími þeirra breytilegur og í takti við þarfir. Skammtímadvölin að Svöluhrauni veitir einstaklingum með langvarandi stuðningsþarfir tækifæri til að fá umönnun og stuðning í öruggu og hlýlegu umhverfi. Dvölin getur bæði verið reglubundin eða aðeins á ákveðnu tímabili.

Þannig getur dvalartíminn verið breytilegur eftir aðstæðum hvers og eins. Oft frá nokkrum sólarhringum upp í mánuði. Með tilkomu þessarar nýju skammtímadvalar er unnt að bjóða upp á meiri sveigjanleika og stuðning en áður fyrir fjölskyldur fatlaðra barna.

Hvíld og afþreying fyrir börnin

Guðrún Halldórsdóttir veitir skammtímadvölinni forstöðu, en hún hefur víðtæka og langa reynslu af störfum með fötluðu fólki.

„Í skammtímadvölinni á Svöluhrauni bjóðum við upp á hvíld og afþreyingu, aðstoð og leiðbeiningar við athafnir daglegs lífs. Með þjónustunni er verið að  létta álagi af fjölskyldum fatlaðra barna og fá börnin tilbreytingu og tækifæri til að njóta sín á stað utan síns heimilis,“ segir hún.

Þessi nýja þjónusta er mikilvæg viðbót við þau úrræði sem þegar eru til staðar. Nefna má skammtímadvöl í Hnotubergi en hún er fyrir fullorðið fatlað fólk sem enn býr í foreldrahúsum.

Hafnfirðingar hafa einnig haft aðgang að skammtímadvölinni í Móaflöt í Garðabæ fyrir börn og áfangaheimili í Hrauntungu í Kópavogi fyrir fullorðið fatlað fólk sem býr í foreldrahúsum. Ný  skammtímadvöl mun gera það að verkum að hægt að koma til móts við þann hóp sem er á biðlista eftir skammtímadvöl.

Meira en úrræði fyrir börnin

„Skammtímadvölin að Svöluhrauni er meira en bara úrræði – hún er heimili þar sem börn geta fengið tímabundna hvíld og afþreyingu utan síns eigins heimilis í öruggu og hlýju umhverfi,“ sagði Sigurður við opnuna.

„Þar spilið þið starfsfólk stærsta hlutverkið. Fyrir ástvini og fjölskyldur veitir þjónustan aukinn sveigjanleika og nauðsynlega hvíld, þar sem öðruvísi álag og ábyrgð geta fylgt því að eiga fatlað barn með langvarandi stuðningsþarfir. Við eigum og viljum taka vel utan um þessi heimili og fjölskyldur þannig að allir fái tækifæri til að njóta sín,“ sagði hann.

„Við sem sveitarfélag erum stolt af því að bjóða upp á þessa þjónustu í okkar nærumhverfi.“ Með tilkomu og þróun skammtímadvalarinnar væri raunverulegri þörf svarað.

„Nú eiga okkar íbúar, sem á þurfa að halda, kost á að njóta þjónustunnar í bænum sínum, hér heima í Hafnarfirði.“