Nýi Neyðarkallinn er mættur í Hafnarfjörðinn  

Mikilvægt neyðarkall til okkar allra!  

Hafnarfjarðarbær styrkir Björgunarsveit Hafnarfjarðar með kaupum á Neyðarkallinum. Neyðarkallinn í ár er hamfarakall með dróna sem er eitt af nýjustu hjálpartækjum við leit að týndu fólki. Hafnarfjarðarbær er stoltur af því að eiga innan sinna raða starfsfólk sem vinnur ötult og óeigingjarnt starf í þágu björgunarsveitanna á Íslandi. Þakklæti til þessara sveita er mikið.  

Rósa Guðbjartsdóttir bæjarstjóri tók á móti hafnfirska neyðarkallinum í dag.  Sala á Neyðarkalli fer fram dagana 30. október til 3. nóvember.  

Árlegt fjáröflunarátak 

Neyðarkallinn er söfnunarátak sem allar björgunarsveitir landsins taka þátt í og skilar um fjórðungi allra tekna sveitanna. Almenningur má eiga von á því að sjá fólk í björgunarsveitargöllum á öllum helstu stöðum.  

Desembermánuður er mesti annatími björgunarsveitanna því þá eiga sér stað stærstu fjáraflanirnar, auk venjulegrar starfsemi og útkalla sem gera sjaldan boð á undan sér.  

Neyðarkall í 19 ár 

Neyðarkall björgunarsveitanna á sér orðið langa sögu að baki þar sem það hófst 2006 og er því um að ræða 19. skipti sem björgunarsveitirnar bjóða almenningi að styðja starf þeirra með því að kaupa Neyðarkall.  

Hagnaður af sölunni rennur til björgunarsveita og slysavarnadeilda og er hann notaður til að efla og styrkja starfið.  

Nánar á síðu Slysavarnarfélagsins Landsbjargar.

Hafnarfjarðarbær hvetur alla til að fjárfesta í einum neyðarkalli og styrkja þarft málefni.