Nýjar lyftur í Bláfjöllum

Þrátt fyrir að lítill snjór sé í fjöllunum eins og er er búið að opna í Bláfjöllum. Þá hittist það vel á að nýja stólalyftan, Drottning, sé tilbúin til notkunar og komin í gagnið. Önnur ný stólalyfta, Gosi, er þá jafnframt tilbúin til notkunar og mun opna um leið og skíðafæri leyfir.

Liður í stóru uppbyggingarverkefni á skíðasvæðunum

Uppsetning lyftanna er liður í stóru uppbyggingarverkefni á skíðasvæðunum, en vinna vegna þess hefur staðið yfir á vettvangi Samtaka sveitarfélaga á höfuðborgarsvæðinu (SSH) allt frá árinu 2018, en þá var undirritað samkomulag Reykjavíkur, Kópavogs, Hafnarfjarðar, Garðabæjar, Mosfellsbæjar og Seltjarnarness um endurnýjun og uppbyggingu á mannvirkjum á svæðinu. Markmið þessara framkvæmda er að bæta aðstöðu og þjónustu fyrir alla hópa skíðaiðkenda. Auk Gosa og Drottningar er m.a. gert ráð fyrir snjóframleiðslu á skíðasvæðunum og Skálafelli auk nýrrar lyftu í Skálafelli. Þá hefur aðstaða á gönguskíðasvæði einnig verið bætt, t.a.m. með uppsetningu nýrrar salernisaðstöðu, kaupum á troðara, snjógirðingum og bættri lýsingu.

Formleg opnun Gosa og Drottningar fara fram við fyrsta tækifæri á nýju ári

Í þessum fyrsta áfanga verkefnisins var samið við Doppelmayr skíðalyftur ehf., sem var lægstbjóðandi í samkeppnisútboði, um kaup og uppsetningu á lyftunum Gosa og Drottningu. Upphaflega var ekki gert ráð fyrir að Drottning yrði tilbúin fyrr en haustið 2023, en framkvæmdir gengu mun betur en vonir stóðu til og verður því hægt að nýta hana á þessu skíðatímabili. Áætlaður framkvæmdakostnaður við nýju lyfturnar er 2,4 milljarðar kr. og áætlaður heildarframkvæmdakostnaður allra framkvæmda, þ.m.t. í Skálafelli og vegna bættrar aðstöðu fyrir skíðagöngufólk, er um 5,3 milljarðar kr. til ársins 2026.

Upplýsingar um opnun á skíðasvæðum höfuðborgarsvæðisins má finna á vef skíðasvæðanna og Facebooksíðu þeirra.

Frekari upplýsingar veita Páll Björgvin Guðmundsson framkvæmdastjóri SSH í síma 8218179 og Magnús Árnason forstöðumaður skíðasvæða höfuðborgarsvæðisins í síma 8921679.