Nýr skólasöngur á 30. starfsári Hvaleyrarskóla

Kurteisi | Ábyrgð | Samvinna – það er Hvaleyrarskóli 

Síðasta skólaár var 30. starfsár Hvaleyrarskóla. Síðasta vor stóð til að hafa þemadaga í byrjun apríl til að fagna þessum stóra áfanga. Vegna aðstæðna í samfélaginu var veislu slegið á frest og ákveðið að tengja afmælið við lok vinavikunnar sem haldin var í skólanum í síðustu viku. Hertar aðgerðir höfðu áfram áhrif á skólastarfið og þar með á sameiginleg hátíðarhöld. Vináttan var að sjálfsögðu í hávegum höfð alla vikuna og tækifærið notað til að frumflytja nýjan skólasöng Hvaleyrarskóla. Til hamingju með stórafmælið Hvaleyrarskóli! 

Vinavika viðeigandi til frumflutnings á skólasöng 

Skólasönginn samdi Guðrún Árný Karlsdóttir tónmenntakennari við Hvaleyrarskóla. Hún fékk Pál S. Sigurðsson, fyrrum nemenda í Hvaleyrarskóla, sem starfar í dag sem skóla- og frístundaliði við skólann með sér í lið þegar kom að textagerðinni.  Þau luku þessu verkefni á vordögum og hefur söngurinn síðan þá verið sunginn af Sönglist Hvaleyrarskóla og einnig hafa nemendur á samverustundum bæði í vor og í haust sungið skólasönginn. Það hefur reynst áskorun á tímum Covid19 að finna viðeigandi tilefni til að frumflytja sönginn fyrir sem flesta og var í vinaviku ákveðið að slá frumflutningi ekki lengur á frest heldur nýta tækifærið og þar með vinavikuna í frumflutninginn enda fátt meira viðeigandi.  Guðrún Árný bjó til myndband við sönginn og eru það nemendur í Sönglistarvali Hvaleyrarskóla sem flytja sönginn við undirleik Guðrúnar Árnýjar.

https://www.youtube.com/watch?v=e_hPu1hOpYs

Skólasöngur Hvaleyrarskóla 

Munum öll – að þakka fyrir það
sem okkur er gefið, sama hvað.
Með jákvæðni og æðruleysi.
Það sem bætir lífið okkar er kurteisi.

Við í Hvaleyrarskóla stöndum hönd í hönd
Ekkert mun slíta okkar vinabönd.
saman skínum skært sem kertaljós
því skólinn minn er mitt leiðarljós

Við hjálpumst alltaf að
nefndu stund og stað,
þá kem ég með
og stend með þér.

Umhverfið – pössum við vel. 
Og pössum hvort annað, líka jafn vel.
Erum vafin vinatryggð.
Það sem bætir lífið okkar er ábyrgð.

Við í Hvaleyrarskóla stöndum hönd í hönd
Ekkert mun slíta okkar vinabönd.
saman skínum skært sem kertaljós
því skólinn minn er mitt leiðarljós

Við hjálpumst alltaf að
nefndu stund og stað,
þá kem ég með
og stend með þér.

Bjóðum hjálp, ef eitthvað er að
og tökum vel eftir, hugsum um það.
Í amstri dagsins er mörgu að sinna
Það sem bætir lífið okkar er, samvinna.

Við í Hvaleyrarskóla stöndum hönd í hönd
Ekkert mun slíta okkar vinabönd.
saman skínum skært sem kertaljós
því skólinn minn er mitt leiðarljós

Við hjálpumst alltaf að
nefndu stund og stað,
þá kem ég með
og stend með þér.

Lag : Guðrún Árný.  Texti : Palli ( Páll S. Sigurðsson) og Guðrún Árný

Saga skólans 

Hvaleyrarskóli tók til starfa haustið 1990 og var yngsti grunnskólinn í Hafnarfirði þar til árið 2001. Skólabyggingin var reist í áföngum og er á einni hæð nema síðasti áfanginn sem tekinn var í notkun haustið 2004. Sá áfangi er á tveimur hæðum vegna halla lóðarinnar. Skólahúsnæðið er bjart og fagurt og hátt er til lofts. Ormar Þór Guðmundsson og Örnólfur Hall teiknuðu skólann. Hvaleyrarskóli var valinn í bók sem heitir Schools for today and tomorrow ásamt þremur skólum öðrum fyrir Íslands hönd, en í formála þessarar bókar segir: “Bók þessi inniheldur sýnishorn af best hönnuðu skólum í heimi í dag. Þeir hafa verið valdir af alþjóðanefnd sem valin var af OECD til þess að taka út byggingar sem hýsa menntastofnanir. Skólarnir endurspegla margar af þeim bestu hugmyndum sem hafa vaknað eftir vinnu þessarar alþjóðanefndar (PEB) síðustu fimm árin”. 

Í skólanum eru tuttugu og ein almenn kennslustofa. Þar er einnig myndmennta-, smíða-, textíl-, heimilisfræði-, raungreina-, tölvu-, tónmennta- og sérkennslustofur. Í skólanum er einnig fyrirlestrarsalur og hátíðarsalur þar sem nemendur borða í hádeginu. Bókasafn er í skólanum og aðstaða fyrir heilsugæslu. Skólalóðin er gróðri prýdd, falleg og vel hönnuð og nýtist vel til leikja. Byggingaframkvæmdir hafa haldist í hönd við fjölgun nemenda í skólanum. Fyrsta árið voru 140 nemendur í níu bekkjardeildum í fyrsta til fimmta bekk. Í dag eru um 450 nemendur í skólanum og starfsfólk liðlega 60. Skólahúsnæðið er nýtt til ýmissa annarra hluta en til hefðbundins skólastarfs. Félagsmiðstöðin Verið starfar í skólanum yfir veturinn og er mikil lyftistöng fyrir félagslíf nemenda. Á sumrin eru haldin námskeið fyrir börn í skólanum á vegum Versins og ÍTH.

Hvaleyrarskóli leggur áherslu á markvissa málörvun en í því felst m.a. að nemendur fá markvissa þjálfun í framsögn og því að tjá skoðanir sínar alla skólagönguna. Ræðupúlt er í öllum kennslustofum til að styðja það starf. Hvaleyrarskóli leggur áherslu á heilsurækt og að bjóða upp á fjölbreytt list- og verknám. Hvaleyrarskóli er SMT skóli en í því felst að lögð er áhersla á að styrkja jákvæða hegðun nemenda, efla og bæta samskipti innan skólans.
Skólaárið 1995-1996 útskrifuðust fyrstu nemendurnir frá Hvaleyrarskóla. Skólinn var þá orðinn heildstæður grunnskóli með nemendur í 1.-10. bekk. Árið 2004 var Hvaleyrarskóli einsetinn í fyrsta skipti og var þar með síðasti grunnskóli landsins til þess að verða einsetinn. Árið 2010 var haldið upp á 20 ára afmæli skólans með pompi og prakt.