Nýr sviðsstjóri stjórnsýslu

Bæjarstjórn Hafnarfjarðarbæjar samþykkti í dag tillögu bæjarráðs að ráða Sigríði Kristinsdóttur, bæjarlögmann, í stöðu sviðsstjóra stjórnsýslusviðs. Samhliða verður gerð sú breyting að störf sviðsstjóra og bæjarlögmanns verða sameinuð. Sigríður tekur við starfinu í lok nóvember.

Sigríður Kristinsdóttir, sem er bæjarlögmaður Hafnarfjarðarbæjar, hefur verið ráðin í stöðu sviðsstjóra stjórnsýslusviðs. Sigríður tekur við af Kristjáni Sturlusyni sem sinnt hefur starfinu síðustu þrjú og hálft ár. Sigríður
lauk embættisprófi í lögfræði frá Háskóla Íslands árið 1989. Hún öðlaðist
réttindi sem héraðsdómslögmaður árið 1994 og hæstaréttarlögmaður árið 2013. Hún
hefur unnið við lögfræðistörf undanfarin 26 ár, þar af sem lögmaður í 21 ár. Sigríður
hefur yfirgripsmikla þekkingu á verkefnum sveitarfélaga og einnig hefur hún
starfað innan stjórnsýslunnar.

Störf bæjarlögmanns og sviðsstjóra stjórnsýslusviðs verða við þessa breytingu sameinuð í eitt starf. Bæjarlögmaður starfar í dag á stjórnsýslusýslusviði og er því um tilfærslu í starfi að ræða. Við breytinguna færast launadeild og tölvudeild til fjármálasviðs af stjórnsýslusviði.  Breytingin opnar á möguleika fyrir eflingu á lögfræðiþjónustu sveitarfélagsins og á næstu vikum verður nýr lögfræðingur ráðinn á stjórnsýslusvið.

Víð óskum Sigríði til hamingju með nýja stöðu innan Hafnarfjarðarbæjar og þökkum Kristjáni fyrir vel unnin og fagleg störf í þágu sveitarfélagsins og óskum honum velfarnaðar á nýjum vettvangi.