Nýtt ákvæði gegn mansali

Hafnarfjarðarbær hefur síðustu mánuði veitt hættunni á mansali sérstaka athygli og farið markvisst yfir innkaupaferla og útboðsskilmála með það fyrir augum að vernda þá sem eru í viðkvæmri stöðu gagnvart mansali. Á fundi umhverfis- og framkvæmdaráðs Hafnarfjarðar í vikunni var samþykkt nýtt ákvæði um mansal í útboðsskilmála bæjarins.    

Nýju ákvæði um mansal verður bætt við alla útboðsskilmála Hafnarfjarðarbæjar og vill sveitarfélagið með þessu leggja sitt að mörkum við afnám mansals á Ísland. Samhliða hefur hluti starfsfólks og eftirlitsaðilar á vegum bæjarins fengið fræðslu um hvernig bera megi kennsl á mansal og mun sú fræðsla halda áfram næstu mánuði. Fulltrúar Lögreglunnar á höfuðborgarsvæðinu voru með fræðslu fyrir stóran hóp af starfsfólki í vor og munu vera með kynningu fyrir alla stjórnendur Hafnarfjarðarbæjar um miðjan nóvember.

Nýtt ákvæði í útboðsskilmálum

Ný samþykkt felur í sér að með undirritun tilboða lýsir bjóðandi því yfir að hann mun tryggja að allir starfsmenn sem koma að verki, hvort sem er starfsmenn bjóðanda eða undirverktaka, fái laun og starfskjör í samræmi við gildandi kjarasamninga hverju sinni og aðstæður þeirra séu í samræmi við löggjöf á sviði vinnuverndar. Jafnframt tryggir verktaki og ber ábyrgð á að allir starfsmenn, hvort sem um ræðir starfsmenn verktaka, undirverktaka eða starfsmannaleiga fái laun, starfskjör, sjúkra- og slysatryggingar og önnur réttindi í samræmi við samninginn, gildandi kjarasamninga og lög hverju sinni. Að auki ber bjóðandi ábyrgð á og skal hafa í gildi og viðhalda tryggingum fyrir tjóni vegna slysa, veikinda, sjúkdóma, sjúkrakostnaðar eða dauða sem starfsmenn verktaka verða fyrir og rekja má til framkvæmda. Bjóðandi ber ábyrgð á að undirverktakar og starfsmannaleigur og starfsmenn þeirra hafi samskonar tryggingar. Hvenær sem er á samningstíma þarf bjóðandi að geta sýnt verkkaupa fram á að öll réttindi og skyldur gagnvart þessum starfsmönnum séu uppfyllt. Bjóðandi samþykkir með undirritun að ef hann getur ekki framvísað gögnum eða sýnt eftirlitsmanni verksins fram á að samningsskyldur séu uppfylltar innan 5 daga frá því ósk um slíkt er borin fram af verkkaupa getur verkkaupi rift verksamningi án frekari fyrirvara eða ákveðið að beita dagsektum sem nemur 0,1% af samningsupphæð fyrir hvern dag sem umbeðnar upplýsingar skortir.