Nýtt farþegahjól fyrir fatlaða gefur og gleður

Draumur Hússins í Hafnarfirði um farþegahjól orðinn að veruleika

Nýverið rættist draumur starfsfólks og þjónustuþega Hússins í Hafnarfirði um að eignast farþegahjól. Húsið eignast hjólin fyrir tilstuðlan viðspyrnuaðgerða stjórnvalda sem ætlað var að efla félagslega þátttöku geðfatlaðra og fatlaðs fólks á tímum Covid. Í samtali starfsfólks og þjónustuþega í Húsinu var ákveðið að nýta styrkinn í verkefni sem væru til þess fallin að auka frelsi og gefa fötluðu fólki tækifæri til að upplifa og lifa lífinu lifandi. Hjólin verða tvö en það fyrra var afhent í vikunni og er óhætt að segja gleðin með hjólin sé mikil og upplifunin einstök og öðruvísi. 

^{Það er samróma álit allra að hjólaferðunum fylgi mikið frelsi og frábær tilfinning.}

Hjólin verða til útláns til heimila og stofnana sem þjóna fötluðu fólki

Farþegahjólið, sem þegar er komið í hús, er af gerðinni Van Raam Chat bike og er rafmagnshjól sem tekur 1-2 farþega og einn hjólara. Hjólin eru hugsuð til útláns í skemmri tíma til heimila og stofnana sem þjóna geðfötluðu og/eða fötluðu fólki. Heimili (búsetukjarnar) fyrir fatlað fólk í Hafnarfirði eru í dag 13 talsins og þar búa 65 einstaklingar í sjálfstæðri búsetu með mismikilli þjónustu eftir færni og getu. Annað hjól er væntanlegt í Húsið á næstunni, Veloplus hjól, sem ætlað er fyrir hjólastóla. Hjólin eru bæði tiltölulega einföld og þægileg í notkun. Fyrsta vikan á Van Raam Chat hjólinu lofar góðu og gleði þeirra sem þegar hafa prófað hjólið einskær og einlæg. Það er samróma álit allra að hjólaferðunum fylgi mikið frelsi og frábær tilfinning.

^{Eitt hjól er komið í hús og  margir farnir eru að bíða eftir hjólinu sem ætlað er fyrir hjólastóla.}

Húsið hýsir fjölbreytt úrræði fyrir fatlað fólk á aldrinum 10-60 ára

Húsið í Hafnarfirði er staðsett að Suðurgötu 14 og hýsir m.a. fjölbreytt frístundaúrræði fyrir fötluð ungmenni á aldrinum 10-25 ára og atvinnuúrræði fyrir einstaklinga á aldrinum 20-60 ára. Þannig eru Geitungarnir atvinnuúrræði og skapandi starf fyrir 20-60 ára, Vinaskjól fjölbreytt tómstundastarf fyrir 16-20 ára og Kletturinn tómstundastarf fyrir 10-16 ára börn og ungmenni. Aðsetur hjólanna verður í Húsinu.