Nýtt fræðslukerfi fyrir starfsfólk sveitarfélagsins

Hafnarfjarðarbær hefur opnað nýtt fræðslukerfi – Eloomi – fyrir allt starfsfólk sveitarfélagsins. Mikil undirbúningsvinna hefur átt sér stað undanfarna daga, vikur og mánuði með aðkomu fagaðila á fjölbreyttu sviði og er það von allra hlutaðeigandi, sem tekið hafa þátt í mótun, þróun og uppbyggingu kerfisins að það marki nýtt upphaf í fræðslumálum innan sveitarfélagsins.

^{Það var engin önnur en Gyða Sól sem opnaði kerfið formlega í beinni útsendingu á Workplace, innri samfélagsmiðli starfsfólks bæjarins, fyrir helgi sem “nýr starfsmaður” Skarðshlíðarskóla. Hér er Gyða Sól með Guðrúnu Þorsteinsdóttur mannauðsstjóra og Rósu Guðbjartsdóttur bæjarstjóra.} 

Hvers vegna rafrænt
fræðslukerfi?

Mikil umbreyting er að eiga sér á öllum sviðum sem kallað
hefur að aukna stafræna miðlun og þjónustu og afgreiðslu í gegnum rafrænar
þjónustuleiðir. Þessi þróun nær einnig til fræðslumála og er framtíðarsýnin sú að
fræðsla og símenntun verði í auknu mæli á rafrænu formi. Með því að nýta fræðslukerfi
eins og Eloomi er verið að einfalda og auka möguleika starfsfólks á öllum
starfsstöðvum sveitarfélagsins á fræðslu og símenntun. „Fræðslukerfið er vettvangur fræðslu og fróðleiks og nú er hægt að
miðla mikilvægri fræðslu til alls starfsfólks sveitarfélagsins með einföldum
hætti. Hluti af fræðslunni er valkvæð og til þess fallin að auka skilning á
Hafnarfjarðarbæ í heild sem vinnustað en síðan er hluti skyldufræðsla fyrir
ákveðna hópa starfsfólks. Þannig er mismunandi fræðsla listuð á hvern og einn
starfsmann og það í takt við starfsstöð og fagsvið. Nú geta stjórnendur á
starfsstöðvum okkar víðsvegar um bæinn líka búið til sérhæfða fræðslu og listað
á sitt starfsfólk. Þetta er nýr
vettvangur til miðlunar fyrir okkur öll“ segir Guðrún Þorsteinsdóttir
mannauðsstjóri Hafnarfjarðarbæjar sem er að vonum ánægð með þetta stóra og
mikilvæga skref sveitarfélagsins í fræðslumálum.

Sú nútímavæðing og stafræna vegferð sem er að eiga sér stað á þjónustu
sveitarfélagsins nær líka til starfsfólks og þeirrar þjónustu sem veitt er
innanhúss. Þessi innleiðing á fræðslukerfi er liður í umbreytingunni og er til
þess fallin að skila skilvirkni í rekstri, skýrari verkferlum og öflugra
starfsumhverfi.