Nýtt og einfaldara leiðanet Strætó í Hafnarfirði

Íbúar, nemendur, starfsfólk og aðrir Strætónotendur í nútíð og framtíð takið eftir!

Nýtt og einfaldara leiðanet hjá Strætó í Hafnarfirði tók gildi fyrr í sumar þegar leið 19 og lengri leið 21 tóku við af leiðum 22, 33, 34, 43 og 44 sem hættu akstri. Þessar breytingar rétta úr leiðum Strætó í Hafnarfirði í takti við Borgarlínuverkefnið á sama tíma og leiðirnar eru beinni og ferðatíminn styttri. Nýtt fyrirkomulag ætti því að henta betur fyrir stóran hóp notenda Strætó sem sækja skóla eða vinnu innan og/eða utan Hafnarfjarðar. Og ekki síður fyrir eldri nemendur grunnskóla sem stunda sínar tómstundir og æfingar víðsvegar um bæinn. 

^{Svona lítur nýtt leiðakerfi Strætó í Hafnarfirði út . Nýtt leiðanet tók gildi 14. júní 2020.} 

• Sjá nýtt leiðanet í Hafnarfirði 

Beinni leiðir og styttri ferðatími

Breytingarnar tóku gildi um miðjan júní eftir langa yfirlegu og gott samtal við notendur Strætó. Leið 19 ekur skv. 15 mínútna tíðni á annatímum og 30 mínútna tíðni utan annatíma. Leið 21 mun áfram aka skv. 30 mínútna tíðni. Tengingar við leiðir 1 og 55 verða til staðar í Firði.  Breytingarnar eru til þess fallnar að henta betur fyrir stóran hóp notenda en í einhverjum tilfellum þurfa notendur Strætó nú að ganga lengri leið á næstu stoppistöð. Kerfið er ávallt í endurskoðun og vonir standa til þess að þessar breytingar verði til þess að fleiri hópar einstaklinga sjái virði og hag í því að nota Strætó sem sinn aðal samgöngumáta, hvort sem er innan sveitarfélagsins eða á ferð sinni um höfuðborgarsvæðið. 

Senda inn ábendingu í gegnum ábendingagátt Hafnarfjarðarbæjar

Stór umbótaverkefni framundan

Um er að ræða fyrsta áfanga í hinu stóra Borgarlínuverkefni og spilar leið 1 þar stóran þátt, sem hefst og endar á Völlunum. Á næstu árum munu almenningssamgöngur á höfuðborgarsvæðinu taka miklum breytingum. Stærstu umbótarverkefnin eru annars vegar uppbygging á Borgarlínu innviðum fyrir hraðvagnakerfi (BRT) og hins vegar endurskoðun á leiðaneti Strætó vegna uppbyggingar Borgarlínu þar sem þörf er á að aðlaga leiðanetið að Borgarlínu og nýta innviði hennar. Þannig verði stuðlað að því að almenningssamgöngukerfið virki sem ein heild.