Nýtt tilraunaverkefni lögreglu og sveitarfélags

Lögreglan á höfuðborgarsvæðinu og
Hafnarfjarðarbær hafa tekið höndum saman og komið á samstarfs- og
þróunarverkefni sem hefur þann tilgang að efla samvinnu þessara aðila í málum
barna og unglinga. Um er að ræða tilraunaverkefni til eins árs sem fer af stað
nú um miðjan mars og hlýtur styrk frá Lýðheilsusjóði.

Sigríður Björk Guðjónsdóttir, lögreglustjóri á
höfuðborgarsvæðinu, hefur haft forgöngu um verkefnið og hefur
Hafnarfjarðarbær komið að undirbúningi sl. mánuði. Sigríður Björk segir
reynsluna vera þá að þverfaglegt samstarf skili mun meiri árangri en þegar
einingar vinna hver fyrir sig og þarna sé unnið að afbrotavörnum í víðu
samhengi. Með þessu tilraunaverkefni fái lögreglan tækifæri til að gera betur í
málefnum barna og unglinga, en þeir hópar séu lögreglu ofarlega í huga. Verkefnið
felur í sér nána samvinnu lögreglunnar og þeirra sem vinna að málefnum barna og
ungmenna hjá sveitarfélaginu. Má þar nefna barnavernd, heimilisofbeldisteymi og
aðkomu að forvarnarstarfi í grunn- og leikskólum, félagsmiðstöðvum og
ungmennahúsi svo eitthvað sé nefnt. Birgir Örn Guðjónsson, lögreglumaður,
sinnir verkefninu af hálfu lögreglunnar en mun hafa aðsetur í Ráðhúsi
Hafnarfjarðar að Strandgötu 6.

Bæjarstjóri Hafnarfjarðar, Rósa
Guðbjartsdóttir, fagnar þessu áhugaverða nýsköpunarverkefni og þar með aukinni
samvinnu Hafnarfjarðarbæjar við lögregluna á höfuðborgarsvæðinu. “Þetta
tilraunaverkefni fellur afar vel að áherslum okkar í BRÚNNI, verkefni sem hefur
verið í þróun síðustu mánuði og felur í sér að brugðist er fyrr við málum og
áhersla lögð á að auka þjónustu við fjölskyldur á fyrri stigum.
Samvinnuverkefni lögreglunnar og Hafnarfjarðarbæjar fellur einnig vel að
áætlunum sveitarfélagsins um Barnvænt sveitarfélag sem unnið verður í samvinnu
við UNICEF” segir Rósa. 

^{Sigríður Björk Guðjónsdóttir, lögreglustjóri á höfuðborgarsvæðinu kynnti samstarfsverkefnið á fundi fjölskylduráðs 15. mars}

^{Birgir Örn Guðjónsson, lögreglumaður mun hafa aðsetur í Ráðhúsi Hafnarfjarðar}