Ótvíræður árangur eldri borgurum í hag

Í febrúar verður tekinn inn nýr hópur í Fjölþætta heilsueflingu 65+ sem er verkefni á vegum Janusar heilsueflingar í Hafnarfirði. Hafnarfjarðarbær og Janus heilsuefling hafa verið í farsælu samstarfi síðan 2018 en bærinn niðurgreiðir þátttakendagjald fyrir einstaklinga 65 ára og eldri sem hafa lögheimili í Hafnarfirði. Nýr hópur verður hópur nr. 10 í verkefninu. Frá upphafi hafa 437 einstaklingar tekið þátt, 178 karlar og 259 konur. 210 þeirra hafa að fullu lokið 2ja ára þjálfun eða 90 karlar og 120 konur.

Árangur ótvíræður – eldri borgurum í hag

Upphafið að þessu verkefni er doktorsverkefni Janusar Guðlaugssonar, PhD-íþrótta- og heilsufræðings; Fjölþætt heilsurækt – Leið að farsælli öldrun. Með verkefninu var ætlað að sýna fram á að snúa mætti öldrunarferlinu við um tíma með markvissum heilsutengdum forvörnum. Rannsóknin stóð yfir í eitt og hálft ár og voru niðurstöðurnar ótvíræðar, eldri borgurum í hag. Það kom í ljós að heilsa hinna eldri batnaði til muna, afkastageta þeirra efldist og hreyfigetan varð betri. Vöðvamassinn jókst samhliða því sem fitumassinn minnkaði. Þá lækkaði blóðþrýstingur verulega og blóðgildi færðust til betri vegar.

Heilsulæsi og sjálfbærni á eigin heilsu

Eitt af markmiðum með heilsueflingunni er að gera einstaklinginn sjálfbæran á eigin heilsu og fræða hann um það hversu oft í viku, hve lengi í senn og hver ákefðin á að vera þegar stunduð er heilsurækt. Þannig eflist heilsulæsið. Til þess að snúa heilsunni til betri vegar þarf einstaklingur að hreyfa sig daglega í um 30 mínútur og stunda styrktarþjálfun 2-3 sinnum í viku. Þá þarf hann að nærast vel, sér í lagi að huga að próteinríkri fæðu vilji hann bæta vöðvamassann. Þetta er lykillinn að áframhaldandi árangri.

Umfangsmiklar mælingar í upphafi og uppbrotstímar

Í Hafnarfirði fara styrktaræfingar fram í Reebok á Tjarnarvöllum og þolæfingar í Kaplakrika og er aðstaðan til fyrirmyndar. Ásamt styrktar- og þoltímum hefur Janus heilsuefling boðið upp á svokallaða uppbrotstíma en það eru tímar sem fara fram utan hefðbundins æfingartíma þar sem þjálfari leiðir hópinn í jóga, línudans og fleira. Í upphafi verkefnisins fara þátttakendur í gegnum umfangsmiklar mælingar sem eru endurteknar á sex mánaða fresti. Þátttakendur fara á líkamsgreiningartæki sem mælir meðal annars vöðva- og fitumassa, fengnar eru upplýsingar um lyfjasögu auk þess sem kannaður er styrkur, liðleiki, jafnvægi, hreyfifærni og þol. Með þessu fæst betri mynd af því hvar þátttakendur eru staddir við upphaf þjálfunar en einnig hvernig þeim vegnar í þjálfuninni. Mælingarnar fyrir nýja þátttakendur í Hafnarfirði fara fram á Lífsgæðasetri St. Jó dagana 21. og 22. febrúar.

Áhugasamir geta fræðst um verkefnið og skráð sig á www.janusheilsuefling.is. Einnig eru veittar upplýsingar í síma: 546 1232.