Samið um uppbyggingu tæplega 600 íbúða

Mikil uppbygging við Hafnarfjarðarhöfn

Í dag voru undirritaðir samningar um uppbyggingu 148 íbúða við Hvaleyrarbraut 4 til 12 annars vegar og hins vegar 110 íbúða auk þjónusturýmis við Hvaleyrarbraut 20. Nýlega var gengið frá samkomulagi um uppbygginu 190 íbúða á Óseyrarbraut 13. Þá var greint var frá því í sumar að 144 íbúðir munu rísa við Hvaleyrarbraut 26-30 ásamt þjónusturýmum.

Samtals hefur því verið samið um uppbyggingu 592 íbúða á svæðinu. Frekari uppbygging íbúða og þjónustu er fyrirhuguð á þessu svæði á komandi árum og mun hún hafa mikil og jákvæð áhrif á ásýnd og mannlíf bæjarins.

Eftirsóknarvert fyrir íbúa og gesti

„Við trúum því að Hafnarfjörður verði enn eftirsóknarverðari fyrir bæði íbúa og gesti við blöndun byggðarinnar. Það er mikilvægt að bjóða upp á fjölbreytta möguleika til búsetu í bænum og verður án efa eftirsótt að búa í nánd við sjóinn og höfnina í firðinum fagra,“ segir Rósa Guðbjartsdóttir bæjarstjóri.

Íbúðahverfin sem um ræðir markast af Hvaleyrarbraut, Lónsbraut og Óseyrarbraut sunnan hafnarsvæðisins, m.a. svokallað Óseyrarhverfi. Lóðirnar hafa fram til þessa verið nýttar undir ýmiskonar atvinnustarfsemi. Margar núverandi bygginga eru komnar til ára sinna og hafa þjónað sínu hlutverki.

Breytt og betri notkun

„Notkun svæðisins hefur einfaldlega breyst í gegnum árin og er því mikilvægt að nýta þetta fallega svæði betur,“ segir Rósa.

Fyrirhuguð uppbygging við Hafnarfjarðarhöfn styður við nýtt svæðisskipulag höfuðborgarsvæðisins, Höfuðborgarsvæðið 2040, þar sem lögð er áhersla á þéttingu byggðar og nærþjónustu.

„Hafnarsvæðið er mjög spennandi valkostur og lykilsvæði í bænum fyrir þéttingu byggðar. Það er framför að hverfa frá því að landssvæðin við sjó í þéttbýli séu eingöngu nýtt undir atvinnustarfsemi, eins og áður var, og gefa íbúum bæjarins tækifæri til að búa á stórkostlegum útsýnissvæðum.“

Mynd/Rósa Guðbjartsdóttir bæjarstjóri, Bjarki Brynjarsson og Eiríkur Óli Árnason frá Hvaleyri fasteignir ehf. undirrituðu í gær samkomulag um uppbyggingu á Hvaleyarabraut 20.