Síðasti áfangi tvöföldunar Reykjanesbrautar í sjónmáli

Samningur um kostnaðarskiptingu undirritaður

Vegagerðin og Hafnarfjarðarbær undirrituðu í dag samning um kostnaðarskiptingu vegna framkvæmda við tvöföldun Reykjanesbrautar milli Krýsuvíkurvegar og Hvassahrauns. Bæjarráð Hafnarfjarðar samþykkti á fundi sínum þann 1. júní síðastliðinn fyrirliggjandi samning þar sem kostnaðarhlutdeild Hafnarfjarðarbæjar í öllum kostnaði verksins er um 10,3%. „Síðasti áfangi tvöföldunar Reykjanesbrautar í Hafnarfirði er í sjónmáli og er það mikið fagnaðarefni. Við höfum lengi beðið eftir þessari stund enda Reykjanesbrautin ein fjölfarnasta braut landsins og framkvæmdin mikilvægur innviður í uppbyggingu samgöngumannvirkja og eflingu samgangna í Hafnarfirði og á höfuðborgarsvæðinu öllu,“ segir Rósa Guðbjartsdóttir bæjarstjóri Hafnarfjarðar.

Framkvæmdin er samstarfsverkefni Vegagerðarinnar, Hafnarfjarðarbæjar, HS Veitna, Mílu, Orkufjarskipta, Ljósleiðarans, Carbfix og Veitna.

Fremri röð frá vinstri: Valdimar Víðisson formaður bæjarráðs, Rósa Guðbjartsdóttir bæjarstjóri Hafnarfjarðar, Óskar Örn Jónsson forstöðumaður hjá Vegagerðinni og Jón Heiðar Gestsson verkefnastjóri. Aftari röð frá vinstri: Sigurður Haraldsson sviðsstjóri umhverfis- og skipulagssviðs, Helga Stefánsdóttir forstöðumaður framkævmda- og rekstrardeildar hjá Hafnarfjarðarbæ og Sigurður Nordal sviðsstjóri stjórnsýslusviðs Hafnarfjarðarbæjar.

Framkvæmdir hefjast af krafti síðsumars

Vegagerðin og ÍAV undirrituðu verksamning um tvöföldun Reykjanesbrautar milli Krýsuvíkurvegar og Hvassahrauns ásamt aðliggjandi hliðarvegum þann 17. maí síðastliðinn. Tilboð voru opnuð 5. apríl en ÍAV bauð tæpa fjóra milljarða króna í verkið sem var talsvert undir áætluðum verktakakostnaði. Undirbúningur er hafinn og framkvæmdir að hefjast á verkstað. Framkvæmdin felur í sér lagningu Reykjanesbrautar á um 5,6 km kafla og inni í verkinu er einnig bygging brúarmannvirkja og undirganga fyrir akandi, gangandi og hjólandi. Á Reykjanesbraut verða gerð mislæg gatnamót við Rauðamel en þar er að finna nýtt framtíðar byggingarsvæði Hafnarfjarðarbæjar. Mislæg gatnamót við Straumsvík verða stækkuð og bætt við tengingu að iðnaðarsvæði Hafnarfjarðar við Álhellu. Einnig verða gerðir eftirlitsstaðir við Reykjanesbraut og stofnstígur fyrir gangandi og hjólandi milli Hraunavíkur og Straums ásamt tengingu við Straumsvík. Vegagerðin mun hafa umsjón með verkinu og sjá um eftirlit sem í þessu verki verður í höndum verkfræðistofunnar Hnits h/f. Stefnt er að því að verkinu verði að fullu lokið í lok júní 2026.

Vegagerðin hefur gefið út myndband um framkvæmdina:

Tilkynning á vef Vegagerðarinnar