Skapandi sumarstörf – Hremma

Hrafnhildur Emma Björnsdóttir, “HREMMA”, er Hafnfirsk listakona og rithöfundur. Hremma vinnur að því í sumar að skrifa og myndskreyta jóladagatalið Katla og Leó bjarga jólunum og setja það yfir á bókaform. Hugmyndin hefur þróast mikið frá fæðingu, það sem fyrst var ætlað sem sjónvarpsefni varð að bók, síðan að teiknimyndasögu og nú aftur að bók.

Bókin „Katla og Leó bjarga jólunum“ fjallar um ævintýri systkinanna, Kötlu og Leó, og pabba þeirra, Grím og Kára, í aðdraganda jólanna. Fjölskyldan kveikir á fjórum aðventukertum, verslar jólagjafir í Kringlunni og krakkarnir fá gjafir í skóinn frá 13 þekktum bræðrum. Systkinin komast að leyndarmáli jólasveinanna og  þurfa að bjarga fleirum en bara jólasveinunum áður en klukkan slær sex á aðfangadag. Einnig koma við sögu jarðhræringar, björgunarleiðangur og tilraun Grýlu til að læra á snjallsíma.

Hrafnhildur Emma segir: Hvað er sumarlegra en jóladagatal í júlí? Ég fékk hugmyndina að jólaævintýri Kötlu og Leós árið 2018 þegar Hugmyndadagar RÚV auglýstu eftir jólaefni. Hugmyndin hefur þróast mikið síðan þá, sjónvarpsefnið varð að bók, síðan að teiknimyndasögu og nú aftur að bók. Hver veit nema það komist einn daginn í sjónvarpið.

Katla og Leó bjarga jólunum er ævintýralegt jóladagatal 

Sagan af systkinunum gerist í kunnulegu umhverfi íslenskrar menningar. Þetta er mikilvæg saga sem eykur sýnileika fjölbreytileika í daglegu lífi. En Það hefur verið ákall í samfélaginu að hafa sýnilegri fjölbreytileika í sjónvarpi og öðru skemmtiefni. Fréttir síðustu mánuði hafa sýnt hve þörfin er mikil því það er komið bakslag í baráttu hinseginfólks og íslendingar sem eiga rætur að rekja til annara landa mæta stöðugum fordómum eða öráreiti.

Þjóðhátíð í Grýluhelli

Hremma samdi, myndskreytti og las einnig upp söguna “þjóðhátíð í Grýluhelli” á Bókasafni Hafnarfjarðar þann 17. júní síðast liðinn, fyrir stóran hóp af krökkum og vakti gríðarlega lukku. Börnin sátu hugfangin og hlýddu á söguna og fylgdust með myndunum á stóru tjaldi meðan sagan var lesin. Hremma myndskreytir allt sjálf og það má sjá nokkrar myndir eftir Hremmu hér fyrir neðan. 

NÁNAR UM VERKEFNIÐ: https://sites.google.com/view/joladagatal/heim

FACEBOOK: https://www.facebook.com/katlaogleo/

INSTAGRAM: https://www.instagram.com/katla_og_leo/

UM SKAPANDI SUMARSTÖRF 2022 

Sumarið 2021 ákvað Hafnarfjarðarbær í samstarfi við Ungmennahús bæjarins, Hamarinn, að endurvekja verkefnið “Skapandi sumarstörf” sem hafði verið starfrækt sumarið 2017. Þá bauðst einstaklingum og hópum á aldrinum 18-20 ára að koma með hugmyndir að skapandi verkefnum í Hafnarfirði. Valdir hópar fengu tækifæri til að starfa við ýmis skapandi verkefni á ýmsum sviðum lista sem einnig myndu lífga upp á mannlífið í bænum, gleðja ferðamenn og íbúa með einum eða öðrum hætti. Starfsfólki Skapandi sumarstarfa, sem rekið er sem hluti af Vinnuskóla Hafnarfjarðar er ætlað að glæða bæinn lífi, gera hann skemmtilegri, fallegri og fjölbreyttari með listrænum og skapandi uppákomum. Verkefnin eru fjölbreytt og höfða til mismunandi aldurshópa og áhugasviða. Klara Ósk Elíasdóttir er verkefnastýra Skapandi sumarstarfa.

Hér má lesa meira um þau sex fjölbreyttu verkefni sem eru hluti af skapandi sumarstörfum í sumar Skapandi sumarstörf 2022 | Fréttir | Hafnarfjörður (hafnarfjordur.is)