Skínum skært í vetur!

Endurskin eykur öryggi í umferðinni 

Nú þegar dag er tekið að stytta er nauðsynlegt að minna á mikilvægi
þess að vera með endurskinsmerki eða endurskin á fatnaði og gott ljós á öllum farartækjum. Endurskinsmerki á fötum og ljós á hjólum auka
öryggi og sýnileika og skipta miklu máli í þeim aðstæðum sem skapast yfir
vetrarmánuðina, í myrkri og hálku.

^{Nemendur í Engidalsskóla ánægðir með endurskinsmerkin sín.}

Endurskinsmerki að gjöf frá Heilsubænum Hafnarfirði

Öll sex ára börn hafa hin síðustu ár fengið endurskinsmerki
að gjöf að hausti frá Heilsubænum Hafnarfirði. Sökum aðstæðna í samfélaginu þá
tafðist afhending merkjanna í ár en allir fyrstu bekkir grunnskóla
Hafnarfjarðar fá merkin afhent í þessari viku. Með framtakinu vill
Hafnarfjarðarbær minna á mikilvægi endurskins og sýnileika í umferðinni og leggja
sitt að mörkum við að auka öryggi barnanna við upphaf grunnskólagöngu þeirra. Foreldrar
og forráðamenn allra barna og ungmenna eru hvattir til að tryggja endurskinsnotkun og
að passa samhliða upp á eigin endurskin og sýnileika. Best er að
hafa endurskinsmerki fremst á ermum, hangandi meðfram hliðum, á skóm eða
neðarlega á buxnaskálm. 

Því meira endurskin á því fleiri stöðum því betra.
Skínum skært í vetur!