Skráning í fjölþætta heilsueflingu 65 ára og eldri er hafin

Leið að farsælum efri árum – nýtt verkefni hefst 28. febrúar 2022 

Fjölþætt heilsuefling er verkefni á vegum Hafnarfjarðarbæjar og Janusar heilsueflingar. Verkefnið er fyrir einstaklinga 65 ára eða eldri sem eru með lögheimili í Hafnarfirði. Verkefnið hefur verið í gangi síðan í febrúar 2019 og hefur gengið mjög vel með hressum og skemmtilegum þátttakendum í Hafnarfirði. Nú geta fleiri 65 ára og eldri skráð sig til leiks. 

Bæting á afkastagetu og hreyfifærni þrátt fyrir hækkandi aldur

Lagt er upp með markvissa þol- og styrktarþjálfun, reglubundnar heilsufarsmælingar, fræðslu og ráðgjöf um holla næringu og aðra heilsueflandi þætti. Markmið með þátttöku í verkefninu er að bæta afkastagetu og hreyfifærni þrátt fyrir hækkandi aldur. Einnig er markmiðið að gera einstaklinginn hæfari til að hægja á öldrunareinkennum með markvissri þjálfun svo hann geti meðal annars sinnt athöfnum daglegs lífs lengur og búið lengur í sjálfstæðri búsetu.

Samhliða þátttöku í þessu heilsueflingarverkefni er verið að óska eftir þátttakendum í vísindarannsókn á heilbrigðissviði. Dr. Janus Guðlaugsson PhD-íþrótta- og heilsufræðingur er ábyrgðarmaður rannsóknar og verkefnis.

Fjölþætt heilsuefling 65+ í Hafnarfirði inniheldur meðal annars:

• Styrktarþjálfun 2x í viku með leiðsögn þjálfara
• Þolþjálfun 1x í viku með leiðsögn þjálfara
• Reglulegir fyrirlestrar á sviði heilsu og velferðar frá sérfræðingum
• Ítarleg heilsufarsmæling á 6 mánaða fresti hjá Janusi heilsueflingu
• Rafrænir heilsupistlar og annar fróðleikur um heilsutengdan lífsstíl
• Aðgangur að lokuðum Facebook hópi með upplýsingum og fróðleik
• Aðgangur að heilsu-appi Janusar heilsueflingar og þjálfunaráætlanir til lengri tíma

Umsókn um þátttöku

Allir 65 ára eða eldri geta sótt um þátttöku á https://www.janusheilsuefling.is/skraning/
Haft verður samband við skráða þátttakendur. Verkefnið hefst 28. febrúar 2022.