Snyrtilegustu lóðirnar og garðarnir

Kirkjugarðar Hafnarfjarðar fengu heiðursskjöld Snyrtileikans
2019 sem afhentur var við hátíðlega athöfn í Gróðrarstöðinni Þöll. Sex eigendur
sérbýlishúsa fengu viðurkenningar fyrir fallega og vel hirta garða
auk þess sem fjölbýlishúsalóðin við Skipalón fékk sérstaka viðurkenningu fyrir
snyrtilega aðkomu og aðstöðu fyrir gesti, fallegan gróður og leiksvæði sem tengist
vel inn á dvalarsvæðið.

Fjöldi ábendinga bárust frá bæjarbúum þegar Hafnarfjarðarbær
leitaði, um mitt sumar, til íbúa eftir tilnefningum til viðurkenninga fyrir
fallega og vel hirta garða, götur, opin svæði eða stofnanalóðir í Hafnarfirði
en val til viðurkenninga byggir eingöngu á innsendum tillögum. Hátt í 20
ábendingar bárust og voru átta viðurkenningar veittar fyrir fallega og
snyrtilega garða með fjölbreytni í gróðri, góða hirðingu og metnað í
garðyrkjustörfum. Með viðurkenningunum vill Hafnarfjarðarbær vekja áhuga
almennings á fegrun umhverfis innan bæjarmarkanna og beina athyglinni að þeim sem
til fyrirmyndar teljast og ættu að vera öðrum hvatning til framkvæmda. Mikilvægt
er að íbúar sem og fyrirtæki séu hvött áfram og verðlaunuð fyrir góða umgengni
og snyrtilegt umhverfi.

Heiðursskjöldur
Snyrtileikans 2019

Kirkjugarðar Hafnarfjarðar hlutu heiðursskjöldinn 2019 fyrir afar
fallegan og snyrtilegan garð sem er bænum til mikils sóma. Í áranna rás hefur
kirkjugarður Hafnarfjarðar þótt sérstaklega snyrtilegur og fallegur. Mikill
metnaður er lagður í hönnun og útfærslu mismunandi svæða og eru öll rými
sérstaklega vel útfærð og í góðu samtali við húsbyggingar og einnig þá starfsemi
sem garðurinn á að þjóna. Gönguleiðir eru snyrtilegar og upplýstar sem gera
aðstöðuna til að sinna leiðum ástvina mjög góða. Frágangur opinna svæða
í kirkjugarðinum hefur ávallt verið til mikillar fyrirmyndar og ekki síst um
jólin þar sem Hafnarfjarðarkirkjugarður spilar stórt hlutverk í því að setja
ákveðinn hátíðarblæ á bæinn með fallegum ljósum á leiðum garðsins. Kirkjugarðar
Hafnarfjarðar þykja til mikils sóma og fengu því heiðursskjöld Snyrtileikans
2019

Yfirlit yfir fallegustu og snyrtilegustu
garðana 2019

Fallegustu og snyrtilegustu garðarnir í Hafnarfirði 2019 eru
eftirfarandi og látum við hér fylgja með þá umsögn sem rituð var um hvern garð
fyrir sig.

Fjóluhvammur 3

Þessi er garður hefur verið fallegur um árabil. Greinilega
gott viðhald og mikið af fallegum og stæðilegum plöntum. Aðkoma að húsi tekur á
móti gestum og gangandi. Fallegt og skjólsælt dvalarsvæði við hús. Þessi garður
hefur afgerandi hlutverk í fallegri götumynd Fjóluhvamms.

Garðavegur 6b

Hér er um sannkallaðan verðlaunagarð að ræða, nostrað hefur
verið við hvert smáatriði og mikil ást og umhyggja lögð í garðinn. Garðurinn er
lítill en öllu er haganlega fyrir komið og hver hlutur á sinn stað. Aðkoma að
húsi, ásamt húsinu sjálfu, er smekkleg og snyrtileg.

Heiðvangur 18

Mjög fallegur garður þar greinilegt er að mikill áhugi á
garðrækt er til staðar. Fjölbreytt úrval plantna og rósa með fallegu samspili
palla, hellulagðra flata og grass. Lítil tjörn með vatnaliljum og stendur þar
garðskáli. Hvert sem litið er, er fjölbreytni mikil og öll rými vel úthugsuð.

Hrauntunga 14

Hér er greinilega mikill garðyrkjuáhugi á ferð. Mikil
fjölbreytni í gróðri og allt viðhald garðsins til fyrirmyndar. Alls staðar er
búið að nostra við hvert smáatriði og sérstaklega gaman er sjá hversu
útsjónarsamir eigendur hafa verið og byggt hús uppá gömlum trjástofni.
Pallurinn tengist húsi á smekklegan hátt með litlu húsi fyrir unga fólkið.
Snyrtimennskan er hér til fyrirmyndar og handbragð allt.

Lindarberg 52

Mjög snyrtilegur og fallegur garður með mikla fjölbreytni í
gróðri. Þegar inní garðinn er komið eru skemmtilegar hellulagðar gönguleiðir og
öll beð vel snyrt og garðurinn í heild sinni mjög snyrtilegur. Mjög fallegur og
gróinn garður í Setberginu. Aðkoma að húsi aðlaðandi og tekur vel á móti gestum.

Suðurgata 9

Hér hefur verið tekið til hendinni, garðurinn er nútímalegur
með fallegum dvalarsvæðum með skemmtilegri lýsingu og mjög fallegum plöntum í
mismunandi kerjum og pottum. Hugvitsamlega raðað upp og býr dvalarsvæðið til
einskonar auka herbergi við húsið. Gróðurinn er fjölbreyttur og greinilega
mikill áhugi á garðyrkju hér á ferð.

Skipalón 5 – fjölbýlishús

Mjög skemmtileg og falleg fjölbýlishúsalóð við Skipalón 5
þar sem aðkoma að húsi er mjög snyrtileg og bakgarðurinn var fallegur með vel
sleginni grasflöt með fallegum trjá- og runnabeðum ásamt garðmublum fyrir gesti
og íbúa lóðarinnar. Lítið en fallegt leiksvæði tengist vel inná dvalarsvæðið. Falleg
sumarblóm í öllum beðum. Þessi lóð er til fyrirmyndar.