Snyrtimennska er fjárfesting

Þegar Héðinn flutti starfsemi sína í Gjáhelluna í árslok
2008 var tekin sú ákvörðun að vanda sem best til umhirðu og stuðla að
snyrtimennsku á lóð fyrirtækisins. Það átti ekki bara við um framhliðina sem
snýr að viðskiptavinum, heldur ekki síður baklóðina. „Lóðin er 30 þúsund fermetrar og mikilvægt að hafa þar allt í röð og
reglu til að koma verkefnum og búnaði fyrir á aðgengilegan hátt. Það sparar
tíma og eykur skilvirkni og yfirsýn og dregur úr sóun. Segja má að
snyrtimennskan sé mjög góð fjárfesting“ segir Ragnar Sverrisson
framkvæmdastjóri Héðins. Fyrir mörgum eru alls konar málmhlutir og tækjabúnaður
kannski ekkert augnayndi en með góðu skipulagi má gera gott úr því. Að
framanverðu er þó ekkert slíkt að sjá og þar er reynt eftir fremsta megni að
fegra umhverfið með góðri umgengni og gróðri. Ragnar segir að miklu hafi skipt
að Ask arkitektar, sem hönnuðu húsið við Gjáhellu, hafi lagt áherslu á
landslagið og umhverfi þess. Grasflatir með trjám eru við húsið að framanverðu
og fallegur trjálundur við eitt hornið. Einnig er lagt upp úr fallegri
aðkeyrslu. „En svona stór lóð verður ekki
snyrtileg af sjálfu sér og við hjá Héðni erum svo heppin að einn starfsmanna
fyrirtækisins, Jón Magnús Kristjánsson, sinnir því verkefni af mikilli alúð
meðfram öðrum störfum hjá fyrirtækinu.“ 
Ragnar segir það enga spurningu að fallegt, skipulagt og snyrtilegt
umhverfi á þessari stóru iðnaðarlóð hafi mjög jákvæð áhrif. „Þetta smitar út til starfsmanna. Það er
auðvelt að detta í það að skilja tæki og búnað eftir sig hvar sem er á lóðinni,
en á endanum yrði það alveg skelfilegt. Þess vegna skiptir svo miklu máli að
hafa góða reglu á hlutunum. Og þetta hefur líka áhrif á umgengnina innanhúss.
Gagnvart viðskiptavinum skiptir auðvitað miklu máli hvaða mynd fyrirtæki gefa
af sér. Ef það er allt í drasli og vanhirðu, hvers á viðskiptavinurinn þá að
vænta? Það segir sig sjálft að snyrtimennska, umhirða og virðing fyrir umhverfinu
skilar sér margfalt til baka“ segir Ragnar. 

^{Viðtal við Ragnar Sverrisson birtist í Fjarðarfréttum fimmtudaginn 15. september 2016.}

Snyrtileikinn 2016 – viðurkenningar til fyrirtækja

Fyrirtækin Héðinn, Krónan, Te & kaffi þykja góðar fyrirmyndir fyrirtækja í snyrtimennsku og almennri umgengni. Þau fengu á dögunum viðurkenningu frá Hafnarfjarðarbæ fyrir snyrtileika. Með þessum viðurkenningum vill Hafnarfjarðarbær vekja áhuga almennings á fegrun umhverfis innan bæjarins með því að beina athyglinni að þeim sem til fyrirmyndar teljast og ættu þannig að vera öðrum hvatning til framkvæmda.

Hreinsunaráskorun til fyrirtækja í Hafnarfirði

Dagana 15. – 30. september stendur hafnfirskum fyrirtækjum til boða að skila timbri og járni í þar til gerða gáma á þremur stöðum í Hafnarfirði.  Með þessu vill Hafnarfjarðarbær færa þjónustuna nær fyrirtækjunum og hvetja þannig fleiri til þátttöku í því að gera iðnaðarhverfin í Hafnarfirði snyrtilegri. Hrein ásýnd hefur áhrif á upplifun og viðskipti og beint framlag allra fyrirtækja skiptir miklu máli fyrir ásýnd atvinnu- og iðnaðarhverfa í Hafnarfirði.

Sjá kort með staðsetningu gáma hér