Sóltún Heilsusetur – ný nálgun í stuðningi við eldra fólk

Sólvangur er miðstöð þjónustu og fyrirbyggjandi stuðnings fyrir eldra fólk

Fyrstu þjónustuþegar í Sóltúni Heilsusetri eru mættir í hús en setrið opnaði formlega 1. september síðastliðinn. Sóltún Heilsusetur býður upp á nýja tegund sérhæfðrar þjónustu sem ætlað er að veita eldra fólki endurhæfingu í þverfaglegri teymisvinnu heilbrigðisstarfsfólks. Markmið er að fólk geti dvalið lengur í sjálfstæðri búsetu við betri lífsgæði og er þjónustan til þess fallin að efla einstaklinginn, virkni hans og getu. Nýja þjónustan er veitt 3. og 4. hæð í fallegu og endurgerðu húsnæði gamla Sólvangs í Hafnarfirði. Hægt verður að taka á móti allt að 39 einstaklingum í einu.

Einstaklingsmiðuð, heildræn og þverfagleg endurhæfing

Sóltún Heilsusetur tekur á móti einstaklingum 67 ára og eldri sem fengið hafa tilvísun frá Heimahjúkrun Heilsugæslu höfuðborgarsvæðisins og Heimaþjónustu Reykjavíkur og þar með faglegt mat á því að endurhæfingin geti leitt til markverðrar aukningar á færni til sjálfsbjargar og að viðkomandi hafi gagn af meðferðinni. Þjónustan er að fullu niðurgreidd af Sjúkratryggingum en gert er ráð fyrir að hver og einn dvelji á setrinu í 4 vikur og fái markvissa, þverfaglega þjálfun og fræðslu frá fjölbreyttum hópi heilbrigðisstarfsmanna og annarra fagaðila. Endurhæfingin felur í sér fræðslu, viðtöl við sérfræðinga, einstaklings- og hópþjálfun, heilsueflandi þjálfun, virkni og félagsstarf. Þessi nýja þjónusta á að draga úr líkum á heilsubresti sem útheimtir þjónustu á bráðamóttöku, heimaþjónustu eða leiðir til ótímabærrar innlagnar á sjúkrahús. ,,Markmið okkar er að útskrifa sterkari og sjálfstæðari einstaklinga sem geta notið betur efri áranna með bættri heilsu“ segir Halla Thoroddsen, framkvæmdastjóri Sóltúns öldrunarþjónustu.

Sóltún Heilsusetur er samstarfsverkefni Heilbrigðisráðuneytis, Sjúkratrygginga Íslands, Hafnarfjarðarbæjar og Sóltúns öldrunarþjónustu sem hefur rekið Sólvang hjúkrunarheimili í Hafnarfirði og heimaþjónustuna Sóltún Heima þar sem áhersla er lögð á heilsueflingu í heimahúsi.

Sjá eldri frétt: Nýsköpun í öldrunarþjónustu verður til á gamla Sólvangi