Sörur, lagtertur og jólailmur á Brikk á Norðurbakkanum

Brikk á Norðurbakkanum

Jólin lita bakaríð Brikk þótt súrdeig og salöt einkenni það sem fyrr. Brikk stendur á Norðurbakkanum.

„Það má segja að staðurinn sé flaggskipið okkar enda sá stærsti,“ segir Oddur Smári Rafnsson, einn af þremur eigendum Brikk. Hinir tveir eru Einar Hjörvar Benediktsson og Davíð Magnússon. Útibúin á Kársnesi og Dalvegi í Kópavogi og það nýjasta á Háteigsvegi í Reykjavík.

„Við fórum af stað með það í huga að búa til lítið sætt bakarí. Síðan urðu viðtökurnar miklu betri en við áttum von á. Við höfum verið í stöðugri uppbyggingu síðan 2017,“ segir Oddur sem ólst upp á Holtinu í Hafnarfirði, af stórri hafnfirskri ætt Sigga Þorláks.

Jólin nálgast og því vert að spyrja hvort þau breyti Brikk? „Já, við bökum smákökur, sörur, jólasnúð og jólaklatta. Og í ár verður lagtertan vegan,“ segir hann og hlakkar til jólavertíðarinnar. 

Opnunartími

•       Mán – Fös, 08:00 – 16:00
•       Lau – Sun, 09:00 – 16:00

Spesíur

Smjör 300 g

Flórsykur 166 g

Egg 2 stk.

Kökuhveiti 470 g

Salt 7 g

Lyftiduft 7 g

Vanilludropar 7 g

Aðferð: 

Smjöri og flórsykri þeytt saman þar til það verður ljóst og loftkennt. Eggjunum er bætt við, einu í einu. Næst er restinni af þurrefnum blandað við og blandað rólega saman.

Deigið er mótað í lengjur sem eru ca. 3 cm í þvermál og fryst. Skerið í ca. 1,5 cm þykkar sneiðar og raðið á plötu. Bakið við 180° á blæstri  í 20 mínútur.

Gott er að dýfa kökunum í súkkulaði til hálfs og skreyta með hnetum.

_____