Spjaldtölvuvæðing í Áslandsskóla

Frá því um síðustu áramót hefur markvisst verið unnið að undirbúning spjaldtölvuvæðingar í Áslandsskóla. Í morgun voru fyrstu tækin afhent þegar nemendur í 5.bekk skólans fengu sín tæki afhent. Krakkarnir voru spenntir fyrir því að fá tækin í hendurnar og ekki síður kennararnir sem hafa verið að undirbúa kennsluna allt frá áramótum.

„Með þessu er verið að stíga mikilvæg skref í að auka fjölbreytni og efla framþróun í hafnfirsku skólastarfi. Hraðar tæknibreytingar bjóða upp á óendanlega möguleika í kennsluháttum og námi og er spjaldtölvuvæðing liður í að nútímavæða skóla bæjarins og fjárfesta í framtíð hafnfirskra skólabarna. Við vitum að reynsla annarra skóla af því að nota spjaldtölvur er góð, ekki síst við að bjóða upp á einstaklingsmiðað nám.  Stefnt er að því að spjaldtölvur verði teknar  til notkunar í öðrum skólum bæjarins á komandi misserum og árum, “ segir Rósa Guðbjartsdóttir formaður fræðsluráðs í Hafnarfirði.

Á næstu vikum munu um 300 nemendur á frá 5. – 10. bekk skólans fá tæki til notkunar. Með þessu vill skólinn vera leiðandi 
í að nýta nýjustu upplýsingatæknina í námi og kennslu.

Leifur S. Garðarsson skólastjóri Áslandsskóla segir kennara hafa fengið námskeið frá utanaðkomandi fagaðilum í skólann svo og hafa verið nokkur námskeið þar sem umsjónarmaður innleiðingarinnar og kennarar kenna og miðla af reynslu sinni. „ Við höfum heimsótt aðra skóla sem hafa tekið Ipad upp við kennslu, sótt fræðslu erlendis ásamt því að Áslandsskóli er í góðu samstarfi við aðra skóla og sveitarfélög sem eru í svipuðum hugleiðingum. Þetta er frumkvöðlastarf, mikill hraði og neysla okkar á upplýsingum er mikil og auðvelt að nálgast upplýsingar. Allt þetta kallar á breytta kennsluhætti, eilítið annan hugsunarhátt sem við í Áslandsskóla erum tilbúin að takast á við.  Góður undirbúningur og markviss uppbygging er lykilatriði og allir hér átta sig á að þetta er ferli sem tekur tíma.  Við ætlum að taka þátt í framtíðinni og víst má telja að einhver hluti grunnskólabarna í dag á eftir að vinna störf sem í dag eru kannski ekki til „ segir Leifur.

Afhending spjaldtölvanna í Áslandsskóla í morgun er fyrsta skrefið í átt að aukinni notkun spjaldtölva í grunnskólum Hafnarfjarðarbæjar og á næstu misserum munu aðrir skólar fylgja í kjölfarið.