Sterkari út í lífið – upptaka frá kvöldstund & nýtt smáforrit

Styrkjum sjálfsmynd barna og ungmenna. Það er besta forvörnin

Heilsubærinn Hafnarfjörður samþykkti á haustmánuðum 2022 þátttöku í verkefninu “Sterkari út í lífið” og hóf innleiðinguna í sveitarfélaginu með ókeypis og hvetjandi kvöldstund í Bæjarbíó sem bar heiti verkefnisins. Kvöldstundin fór fram í Bæjarbíó 25. október síðastliðinn og innihélt reynslusögur og fræðslu til foreldra og fagaðila auk verkfæra sem eru til þess fallin að efla og styrkja börn og ungmenni. “Sterkari út í lífið” er verkfærakista ætluð foreldrum og fagfólki sem hefur það að markmiði að auka aðgengi að faglegu efni sem hægt er að nota hvar sem er og hvenær sem er til að ýta undir og styrkja sjálfsmynd barna okkar og ungmenna. Verkfærakisturnar eru aðlagaðar út frá aldri og þroska. Í árslok 2022 gaf hópurinn á bak við verkefnið út nýtt smáforrit sem inniheldur fjöldan allan af öflugum hugleiðsluæfingum í mismunandi lengdum fyrir börn, ungmenni og fullorðna.

Upptaka frá hvetjandi kvöldstund

Forvarnarverkefni fyrir fjölskyldu og fagfólk

„Sterkari út í lífið“ er forvarnarverkefni sem hefur það að markmiði að veita ókeypis aðgang að efni, sem allt er byggt á traustum og gagnreyndum grunni vísindanna, og á að aðstoða uppalendur og fagfólk við að takast á við þær ólíku og oft á tíðum krefjandi áskoranir sem fylgt geta uppvextinum. Sálfræðistofan Höfðabakka er framkvæmdaraðili verkefnisins í samstarfi við stóran hóp fagfólks og félög eins og Heimili og skóla – landssamtök foreldra.

Vettvangurinn er vefurinn www.sterkariutilifid.is og þar má meðal annars finna ýmsa fræðslu og fróðleik um málefni sem allir uppalendur velta fyrir sér á einhverjum tímapunkti:

• Tilfinningar okkar birtast ekki upp úr þurru
• Hvaða máli skiptir samkennd?
• Bekkjarsáttmáli
• Hugsanaskekkjur og endurmat
• Innri gagnrýnandinn
• Áhrifavaldar og ósanngjarn samanburður
• Á ég að stoppa notkun samfélagsmiðla?
• Börn og miðlanotkun

Efni sem hægt er að nota heima við og styrkir sjálfsmynd

Metnaðarfullt smáforrit með æfingum til að þjálfa börn og foreldra í slökun og hugleiðslu hefur nú litið dagsins ljós. Smáforritið hentar börnum og uppalendum til að hægja aðeins á í nokkrar mínútur og ná meiri ró. Þannig má bæði stýra betur líðan í vöku og einnig stuðla að betri svefni. Bryndís Jóna Jónsdóttir og Anna Dóra Frostadóttir hjá Núvitundarsetrinu sáu ritstjórn á smáforritinu en á bak við þær liggur mikil reynsla við innleiðingu slíkra æfinga til allra aldurshópa. Einnig er í smíðum ný verkfærakista um félagsfærni. Í þeirri verkfærakistu verða verkefni sem taka til dæmis á fyrirgefningunni, lausn ágreiningsmála, vináttu, hlustun, drama í samskiptum og því að seta sig í spor annarra. Félagsfærni er einn hornsteinn sterkrar sjálfsmyndar og börn og ungmenni þurfa á leiðsögn að halda því hvers kyns árekstrar hafa bein áhrif á sjálfsmynd.

Vefur verkefnisins – Sjálfsmynd – Sterkari út í lífið (sterkariutilifid.is)

Næsta hvetjandi kvöldstund Heilsubæjarins Hafnarfjarðar verður haldin í Bæjarbíói miðvikudaginn 22. mars kl. 20 þar sem hinsegin málefni, fræðsla og forvarnir verða í forgrunni. Stýring kvöldstundar verður í höndum Kristínar Blöndal Ragnarsdóttur kennara og kynjafræðings. Dagskrá er í mótun og verður auglýst von bráðar.