Stolt starfsfólk og vaxandi starfsánægja

Um árabil hefur
Hafnarfjarðarbær, í samstarfi við þriðja aðila, kannað ánægju og viðhorf
starfsmanna til m.a. starfsumhverfis, samskipta og stjórnunarhátta og hafa
niðurstöður verið nýttar til betrumbóta og umbóta á þeim 70 starfsstöðvum sem
starfsemi Hafnarfjarðarbæjar dreifist á. Niðurstöður nýjustu
vinnustaðagreiningarinnar eru heilt yfir ánægjulegar fyrir Hafnarfjarðarbæ þar
sem allir þættir í könnun hækka á milli ára og aðeins einn þáttur lækkar. Sá
þáttur, sem snýr að álagi, er þegar í gagngerri skoðun hjá stjórnendum
bæjarins.

Starfsánægja hækkaði úr 7,4 í 7,9 milli ára og sýna
niðurstöður að ánægja fólks í starfi og starfsandi á vinnustöðunum hefur aukist
umtalsvert á milli ára. Einnig fjölgar þeim sem eru stoltir af því að vinna hjá
bænum, þeirra sem líður vel í vinnunni og eru ánægðir með tæki og gögn á
vinnustað, þjálfun og fræðslu og upplýsingaflæði. Framundan er úrbótavinna
innan skóla, safna og stofnana Hafnarfjarðarbæjar þar sem allir munu leggjast á
eitt við að gera gott enn betra. Samkvæmt nýlegri þjónustumælingu Gallup hefur
ánægja íbúa með þjónustu bæjarins líka aukist og nokkuð vel gengið að manna
lausar stöður hjá bænum. Svo virðist sem sveitarfélagið þyki spennandi
vinnustaður með þann fjölbreytileika sem ríkir í störfum starfseminnar og
kallar á ólíka menntun, færni og þekkingu. Berglind G. Bergþórsdóttir hefur
verið mannauðsstjóri hjá Hafnarfjarðarbæ í þrjú ár og heldur hún utan um öll
mannauðstengd verkefni og veitar ráðgjöf til annarra stjórnenda. Samhliða
vinnur hún ásamt öflugu teymi að innleiðingu á jafnlaunastaðli hjá bænum sem
miðar að því að tryggja jafnan rétt kvenna og karla og tryggja að þau njóti
sömu kjara fyrir sömu eða jafn verðmæt störf. Ef allt gengur eftir mun
sveitarfélagið hljóta jafnlaunavottun strax í sumar.

Af hverju gengur
þetta svona vel? Hvernig farið þið að þessu?
Ég geri ráð fyrir að þær úrbótaaðgerðir sem við höfum þegar farið í á
undanförnum árum séu farnar að skila árangri og starfsmenn farnir að upplifa
breytingu. Við erum að sjá þónokkra hækkun á milli ára og er það okkur hvatning
til frekari verkefna og vinnu með stjórnendum og starfsmönnum.Líklega eru það
margir samverkandi þættir sem gera það að verkum að við sjáum mun á
heildarniðurstöðum m.a. metnaðarfullt starf og öflugt starfsfólk, samstilltur hópur stjórnenda, aukið samtal
og flæði upplýsinga þar sem raddir starfsmanna hafa mikið að segja og aukin
áhersla á mannauðstengd málefni.  Þetta
vinnur allt saman.

Hvaða áherslum
gangið þið út frá til að auka starfsánægju meðal starfsmanna bæjarins? Með reglulegum mælingum, eins og vinnustaðagreiningu,
er hægt að fylgjast kerfisbundið með því hvernig starfsfólk upplifir
vinnustaðinn, hvað er vel gert og hvað má betur fara. Stjórnendur hafa verið
öflugir í að fylgja niðurstöðunum eftir með úrbótaverkefnum sem eru skilgreind
í samvinnu við starfsfólk. Jákvæðari rekstrarniðurstöður sveitarfélagsins hafa
opnað á tækifæri til úrbóta, ekki bara út á við heldur inn á við líka.  Hafnarfjarðarbær er heilsueflandi samfélag og
höfum við á nýjan leik tekið upp líkamsræktarstyrki til að ýta undir
heilsueflingu okkar starfsfólks. Um síðustu jól fékk allt starfsfólk bæjarins
jólagjöf í fyrsta skipti sem var vel þegið framtak. Samhliða höfum við ákveðið
að veita öllum þeim sem starfa hjá bænum til lengri tíma sérstaka viðurkenningu
fyrir störf í þágu bæjarins á 15 og 25 ára starfsafmælum þeirra. Öll viðleitni
í þá átt að þakka starfsfólki fyrir vel unnin störf, skilar sér klárlega í
aukinni starfsánægju.

Hvernig eflið þið
millistjórnendur og þau sem fara með mannaforráð til að samskipti gangi sem
best? Undanfarin misseri hafa nokkrir hópar
millistjórnenda sótt skipulagða stjórnendaþjálfun hjá ráðgjafafyrirtækinu
Hagvangi. Stefnt er að því að allir stjórnendur bæjarins fari í gegnum slíka
þjálfun, með það að markmiði að efla þá í þeirra daglegum störfum. Í þessari
þjálfun er lögð áhersla á mannlega þáttinn í starfi stjórnandans, en mikilvægt
er að stjórnandinn þekki sjálfan sig, styrkleika og takmarkanir og um leið
þekki hann fólkið sitt og þeirra þarfir. Ég er þeim innan handar með ráðgjöf og
sérþekkingu á sviði mannauðsmála og höfum við lagt áherslu á að einfalda öll
kerfi, setja upp ný kerfi og greiða aðgang að nauðsynlegum upplýsingum og
gögnum. Þetta hefur verið að virka mjög vel.

Bjóðið þið upp á ýmis
námskeið, fyrirlestra eða endurmenntun fyrir skóla og stofnanir bæjarins? Litróf
fjölbreytileikans í starfsemi Hafnarfjarðarbæjar er ansi mikið og því erfitt að
skipuleggja dagskrá námskeiða sem henta öllum. 
Það er öflugt fræðslu- og endurmenntunarstarf í gangi á hverju sviði
fyrir sig. Bæði skólastigin  nýta t.a.m.
starfsdaga til sameiginlegs námskeiðahalds, svo eitthvað sé nefnt. Við
styðjumst síðan við árleg starfsmannasamtöl til að greina fræðsluþarfir
starfsfólks. Er hugmyndin sú að hver og einn sæki sí- og endurmenntun sem
byggir á þeirri greiningu. Undanfarið ár höfum við í samstarfi við Starfsmennt
skipulagt og boðið upp á námskeið fyrir ófaglært starfsfólk í grunnskólum, búsetukjörnum
og á bókasafni. Er um að ræða nokkrar lotur námskeiða sem voru settar saman
eftir ítarlega greiningarvinnu og eru námskeiðin sérsniðin að þörfum þessa starfshópa. Starfsmönnum stendur einnig til boða að skrá sig í Dokkuna og
Stjórnvísi, sem eru þekkingar- og tengslanet fyrir stjórnendur og aðra í
atvinnulífinu. Einhver hópur hefur verið að nýta sér þessa möguleika.

^{Viðtal við Berglind G. Bergþórsdóttur, mannauðsstjóra Hafnarfjarðarbæjar var birt í Fjarðarpóstinum fimmtudaginn  16. mars sl.}