Strandgate Film Festival í kvöld í Bæjarbíó

Skærustu stjörnur sólkerfisins verða samankomnar í Bæjarbíói í Hafnarfirði í kvöld kl. 20 til að keppa um ein virtustu kvikmyndaverðlaun veraldar á kvikmyndahátíð sem er raunveruleiki í óraunveruleikanum.

^{Birta Sólveig Söring, Berglind Alda Ástþórsdóttir, Katla Þ. Njálsdóttir og Kolbeinn Sveinsson eru í hópnum á bak við hátíðina}

Myndir sem enginn hefur séð leiknar af stjörnum sem enginn þekkir

Aðstandendur hátíðar eru að rúlla út rauða dreglinum og lýsa upp innganginn að Bæjarbíói fyrir kvöldið. Strandgate-kvikmyndahátíðin er áhugaverð nálgun og millivegur leikrits og gjörnings sem unnin er af ungu listafólki í Skapandi sumarstörfum Hafnarfjarðarbæjar 2022. Þeim Berglindi, Kolbeini, Kötlu og Birtu. Ágúst Örn Börgesson Wigum tökumaður og klippari bættist á seinni stigum við hópinn sem hefur síðustu vikur skellt sér í fjölbreytt hlutverk sem m.a. leikarar, kynnar, tæknimenn, ljósmyndarar og leikstjórar. Hópurinn hefur lagt sig fram um að búa til hátíð sem fangar anda kvikmyndahátíða um allan heim og hlaut í upphafi sumars menningarstyrk bæjarráðs.

Óraunveruleiki í raunveruleikanum

Í anddyri taka á móti gestum hátíðar plaköt af stærstu kvikmyndum hátíðarinnar: Ekkjan, Hefnandinn 4: Hinsta hefnd hefnandans, Blesi & Lesbían, períódan Móðurharðindin og norska stórmyndin Jeg heter Lina. Kvikmyndirnar eru skáldaðar sem og hátíðin sjálf en hátíðin sjálf fer fram í raunveruleikanum. Leikarar bregða sér í hlutverk stórstjarna og munu með stiklum gera grín að klisjukenndum kvikmyndum sem sýna oft á tíðum gráan raunveruleika fólks.

Verkið er sextíu mínútna kvöldskemmtun sem fer fram í Bæjarbíói í kvöld kl. 20. Nokkur sæti eru laus og allir áhugasamir hvattir til að mæta ef einhver skyldi forfallast. 

Aðgangur er ókeypis. 

Nánari upplýsingar um viðburðinn