Laugin og aðstaðan

Í Suðurbæjarlaug er 12,5 x 25 metra útisundlaug sem er samtengd við sérhannaða kennslulaug innandyra sem er einnig góð barnalaug. Úti eru þrír heitir pottar, vatnsgufa, bunusveppur í vaðlaug, tvær vatnsrennibrautir og tvö köld kör með mismunandi hitastigi. Vinsæll göngustígur liggur um sundlaugargarðinn.

Í kjallara Suðurbæjarlaugar eru búningsklefar og Gym heilsa líkamsrækt. Sérstakir búningsklefar með sánaklefum fyrir karla annars vegar og konur hins vegar eru við hlið hefðbundinna búningsklefa. Á útisvæði eru einnig búningsklefar undir berum himni.

Í lauginni er hefðbundið skólasund, sundæfingar SH, ungbarnasund, Meðgöngusundi Faðmur, Sundskóli Hörpu og vatnsleikfimi. Í húsnæði laugarinnar starfa þrír nuddarar.

Saga Suðurbæjarlaugar

Suðurbæjarlaug hefur notið mikilla vinsælda frá fyrsta degi, en hún var var formlega tekin í notkun þann 28. október 1989. Hönnuður sundlaugarinnar er Sigurþór Aðalsteinsson arkitekt.

Fjöldi fastagesta á öllum aldri nýtur þess allt árið um kring að mannvirkið var hannað í upphafi  af vandvirkni og framsýni ásamt því að stór garður með mikið af sígrænum trjám umlykur sundlaugarsvæðið og veitir skjól allt árið um kring.