„Þetta breytti lífi mínu“ – Tækifæri til að vinna skapandi sumarstörf

Hugmyndarík ungmenni í skapandi sumarstörfum

„Það breytti lífinu mína að taka þá í skapandi sumarstörfum. Ég vissi fyrir hver ástíðan mín var; að skapa og myndlist, en fann tilganginn minn, því áður hafði ég aldrei fengið tækifærið að sýna að þetta væri mín braut,“ segir Þorbjörg Signý Ágústsson sem sinnti skapandi sumarstarfi fyrir fjórum árum og er nú annar tveggja leiðbeinanda.

Alls fá ellefu tækifæri í sumar til að vinna skapandi sumarstörf. Einmitt sumarið 2021 ákvað Hafnarfjarðarbær að endurvekja verkefnið “Skapandi sumarstörf” sem hafði verið starfrækt sumarið 2017. Það hefur síðan lifað góðu lífi. Nú verður sjötta sumarið þar sem starfið er í boði.

Starf fyrir 18-25 ára

Þorbjörg lýsir því hvernig hún hafði verið í sjálfskipaðri endurhæfingu þegar tækifærið á skapandi sumarstarfi gafst. „Það gekk ekki vel að halda mér í hefðbundinni vinnu. Tilvonandi best vinkona mín spyr mig hvort ég ætlaði ekki að taka þátt í skapandi sumarstörfum. Tveimur dögum seinna er ég búin að sækja um og fékk.“

Hún gerði innsetningarverkið Höfgar Nauðir, nafn sem kemur úr Völundarkviðu og þýðir þungir hlekkir, og setti upp í Hellisgerði. „Það breytti lífinu mínu að fá að vinna með Klöru Elíasar. Ég fór frá því að vera einangruð í að fá rödd og tilgang fyrir hversdagslífið. Á þessum tíma fór ég frá því að vera hrædd og óörugg í að hafa trú á sjálfri mér. Ég tók 700 skref á hverjum degi í eigin sjálfsöryggi og virkni,“ lýsir hún. Nú sé hún komin hringinn; Full Circle Moment.

„Ég er komin í þessa stöðu að geta tengt við þessa einstaklinga sem nú standa í mínum fyrri sporum, hef fagreynslu en um leið skil ég hvernig þeim líður,“ segir hún. Núna er hún útskrifuð eftir fjarnám frá Menntaskólanum á Tröllaskaga. Málverkin tvö sem sjást bakvið hana eru hluti af seríu sem tilheyra útskriftarverkefni hennar.

En hver mega svo sækja um skapandi sumarstörf? Einstaklingar á aldrinum 18-25 ára. Ungmennin sem sinna skapandi sumarstari er ætlað að glæða bæinn lífi, gera hann skemmtilegri, fallegri og fjölbreyttari með listrænum og skapandi uppákomum. Verkefnin eru fjölbreytt og höfða til mismunandi aldurshópa og áhugasviða.

Oft vinna tveir til þrír að verkefni saman í þessari sumarvinnu sem tveggja mánaða laun eru greidd fyrir. Já, þetta er starf sem gefur þessum skapandi einstaklingum tækifæri til að vinna við það sem þau vilja lifa fyrir.

Ráðið eftir umsókninni

Hvað þarf að gera til að landa starfinu? Gera þarf umsókn þar sem verkefninu er lýst. Það getur verið múr fyrir margra og því er hægt að sækja stuðning og fræðslu um slíkt hjá starfsfólki Nýsköpunarsetursins við Lækinn. Oft getur verið erfitt að koma hugmyndum sínum á blað, en takist það gæti starfið beðið eftir þér.

„Ég er rosalega spennt,“ segir Þorbjörg. „Ég held þetta verði æðislegt sumar. Ég hlakka til að kynnast þeim og leggja mitt af mörkum. Sjá hvað þau hafa upp á að bjóða. Það eru ótrúlega spennandi tímar framundan.“

Skapandi sumarstörf er rekin sem hluti af Vinnuskóla Hafnarfjarðar.

Nánari upplýsingar: HÉR

Þorbjörg fyrir utan Nýsköpunarsetrið við Lækinn þar sem skapandi sumarstörf hafa aðsetur nú í sumar. Hún er þar annar tveggja leiðbeinanda.