Þetta er besti dagurinn í lífinu!

Nýverið fór fram Grunnskólahátíð Hafnarfjarðar, þar sem um það bil 800 unglingar mættu, dönsuðu og skemmtu sér án nokkurra vandkvæða og voru til mikillar fyrirmyndar. Sara Pálmadóttir og Sigmar Ingi Sigurgeirsson verkefnastjórar hátíðarinnar, eru einnig deildarstjórar tveggja af níu (með NÚ) tómstundamiðstöðva grunnskólanna í Hafnarfirði. Bæjarblaðið Hafnfirðingur hitti þau á dögunum og spjallaði um hátíðina. 

Sara og Sigmar byrjuðu undirbúning hátíðarinnar í lok nóvember með því að hitta alla formenn og varaformenn nemendafélaga grunnskólanna og spyrja hvernig þau sæju fyrir sér hátíðina. „Það eru þau sem ráða þessu. Við verðum við óskum þeirra eftir bestu getu og leiðbeinum með það sem þarf, t.d. með þema, DJ, tónlistaratriði og slíkt. Fyrir þeim skiptir t.d. liturinn á armbandinu miklu máli og þau vilja ekki lengur hafa happdrætti á miðju balli. Þetta gengur fyrst og fremst út á samvinnu. „Við látum þau alveg vita hvað tónlistarmenn taka fyrir að mæta svo að þau átti sig á kostnaðinum,“ segir Sara.

Vilja ná til krakka sem eru ekki í íþróttum

Sara hefur starfað í Mosanum, félagsmiðstöð Hraunvallaskóla, síðan árið 2011 og Sigmar er á sínu 10. ári við ýmis störf tengd félagsmálum í bænum, núna í Vitanum í gamla Lækjarskóla. „Ástæðan fyrir því að við störfum við þetta er að þetta er skemmtilegt. Við höfum fylgt þessum krökkum frá 1. og upp í 9. og 10. bekk,“ segir Sigmar. Sara bætir við að það sé líka kostur að mæta í vinnuna og vita ekkert hvernig dagurinn verður. „Það skiptir máli að hafa ofan fyrir krökkunum, það er mikið forvarnargildi í að þau mæti. Við erum dugleg með alls kyns fræðslu og leggjum mikið á okkur til að fá krakka til okkar sem eru ekki í íþróttum eða öðrum áhugamálum.“

Góð mæting og þátttaka

Tveir til fjórir stórir sameiginlegir viðburðir skólanna eru á mánuði yfir árið, auk viðburða í tengslum við Samfés; Stíll hönnunarkeppni, leiktækjakeppni, söngkeppni, danskeppni og rafíþróttamót. „Það er mjög góð mæting öll kvöld í félagsmiðstöðvarnar og unglingar eru tilbúnir að taka þátt í öllu sem er á dagskrá,“ segir Sara og Sigmar bætir við að þau séu líka mjög dugleg að koma með hugmyndir. „Þeim finnst sameiginlegir viðburðir félagsmiðstöðvanna vera skemmtilegir, t.d. ball fyrir póstnúmerin 220 og 221 og svo erum við dugleg að heimsækja aðrar félagsmiðstöðvar. Kannski mæta 50 unglingar á opnunarball í einum skóla en 200 manns í göngutúr kringum Hvaleyrarvatn.“

Þetta er besti dagurinn í lífinu! 

Sara og Sigmar eru sammála um að það sé gefandi að fylgjast með krökkum blómstra í félagsstarfi, tengjast og efla félagslegan þroska. „Það er svo gaman að fylgjast með þeim gera góða hluti þegar þau eru farin frá okkur, eins og t.d. Króli [Kristinn Óli Haraldsson söngvari], sem var formaður nemendaráðs í Hraunvallaskóla. Í Setbergsskóla eru þau til dæmis með „Wall of Fame“ til að hampa fyrrum nemendum,“ segir Sara og rifjar upp aðspurð að mest gefandi séu stundir þegar krakkar sýna þakklæti, knús og hlýju fyrir bara eitthvað smáræði, eins og að bjóða upp á popp í frístund; „Sara, þetta er besti dagurinn í lífinu!

Viðtal við þau Söru og Sigmar birtist í Hafnfirðingi 24. febrúar