Þjónustusamningur við FEBH undirritaður

Samið við Félag eldri borgara í Hafnarfirði

„Hér er bara ungt eldra fólk,“ sagði Valgerður Sigurðardóttir, formaður Félags eldri borgara Hafnarfjarðar glettin þegar hún ritaði undir þjónustusamning félagsins við Hafnarfjarðarbæ í gær um rekstur og starfsemi félagsmiðstöðvarinnar Hraunsels.

„Já, við erum að fara að skrifa hér undir rekstrarsamning, eins og gert er við stærstu félögin hér í bænum. En félag eldri borgara hefur vaxið mikið undanfarin ár,“ sagði þessi formaður félagsins til áratugs.

Fjölgar í félaginu

„Það eru stækkandi kynslóðirnar sem eru að komast á eftirlaunaaldur. Þá þykir við hæfi að ganga til liðs við okkur í Félagi eldri borgara – vegna þess að hér er ungt eldra fólk. En í raun og veru eru þrjár kynslóðir sem heyra til félags eldri borgara hér hjá okkur. Við eigum sex félaga sem eru 100 ára og eldri,“ sagði Valgerður og að ganga mætti í félagið sextugur.

„Mér finnst stórt skref stigið. Þetta eru tímamót í sögu félagsins sem verður 58 ára gamalt 26. mars næstkomandi,“ sagði Valgerður þegar hún skrifaði undir rekstrarsamninginn við bæjarstjórann.

Samningurinn hljóðar upp á húsnæði fyrir félagsstarfið en félagið greiðir allan rekstrarkostnað. Þá leggur bærinn 3,5 stöðugildi starfsmanna, þar af 1 stöðugildi verkefnastjóra sem fer með daglega umsjón. Hafnarfjarðarbær um starfsmanna- og launatengdan kostað. Þá greiðir bærinn viðhald og búnað og greiðir hálfa milljón í umsjón viðburða. Þá fer 250 þúsund til verkefna unnin af hendi stjórnar og nefnda og fyrir almennu skrifstofuhaldi. Gildistíminn er út árið 2027.

Framsýnt félag tilnefnt til UT-verðlauna

Félagið er framsýnt sem sést meðal annars á því að það var tilnefnt sem UT-fjölbreytileika fyrirmynd 2025 á UT-messunni sem haldin var í síðustu viku. Félagið var tilnefnt fyrir að taka á móti félögum á nútímalegan hátt.

„Við erum mjög stolt af því og þó að við höfum ekki fengið verðlaunin voru þarna mestu tæknifyrirtæki á landinu. Við erum komin í þeirra hóp og það vakti mikla athygli,“ segir Valgerður. „Til hamingju öll.“ Svona hljómaði tilnefningin:

„Félag eldri borgara í Hafnarfirði

Félagið vinnur markvisst gegn einmanaleika og einangrun. Félagsstarfið er sjálfbært. Á árinu 2018 var hvatinn að hætta að selja kaffi og bjóða það í nafni félagsins. Stafræn félagskírteini voru tekin upp 2023 sem viðbótarvalkostur. Árið 2024 var starfsemin kynnt á heimasíðu febh.is á íslensku, ensku og pólsku. Samhliða gaf félagið út vikudagskrá félagsstarfsins á íslensku, ensku og pólsku. Árið 2025 var sett upp ný heimasíða á grunni þeirrar gömlu, tilgangurinn er að gera hana aðgengilegri og einfaldari. Félagið setur sér það að markmiði að mæta eldra fólki í nútímasamfélagi til að tryggja að enginn verði undanskilinn vegna tungumála eða menningarmunar.“

Stuðningur við félagið aukinn

Valdimar sagði Hafnarfjarðarbæ stoltan af því að formgera rekstrarsamninginn með þessum hætti. „Þetta er búið að vera stuðningur við félagið í mörg ár og nú væri bætt í,“ sagði hann. Fjölskylduráð hafi verið einhuga um það.

„Starfið hér í þessu húsi er til fyrirmyndar og eftir því tekið út um allt land,“ sagði Valdimar. „Þetta er stór dagur og ánægjulegt að geta formfest samstarfið í þessum samning.“

Til hamingju öll með frábært félag og árangur!