Tólf ný sérhæfð dagdvalarrými opnuð í Hafnarfirði

Heilbrigðisráðherra hefur veitt Hafnarfjarðarbæ rekstrarheimild fyrir tólf nýjum dagdvalarrýmum fyrir fólk með heilabilun. Hafnarfjarðarbær mun útvega húsnæði fyrir reksturinn og ábyrgjast að þjónusta við notendur verði veitt á faglegum grunni í samræmi við þarfir fólks með alzheimer og aðra minnissjúkdóma. Leitað verður eftir samvinnu við Alzheimersamtökin sem faglegum bakhjarli þjónustunnar.

Svandís Svavarsdóttir heilbrigðisráðherra segist afar ánægð með að hafa getað orðið við ósk bæjarfélagsins um að auka þessa mikilvægu þjónustu, því þörfin sé brýn: „Bætt heilbrigðisþjónusta við aldraða samhliða stórsókn í fjölgun hjúkrunar- og dagdvalarrýma er áherslumál sem ég hef sett í sérstakan forgang. Vinna við stefnumótun í málefnum fólks með heilabilun er komin vel á veg og það er alveg ljóst að fjölgun sérhæfðra dagdvalarrýma fyrir fólk með alzheimer og aðra minnissjúkdóma felur í sér mikla bót fyrir þennan sjúklingahóp og aðstandendur þeirra“ segir Svandís Svavarsdóttir heilbrigðisráðherra.

„Við höfum lengi talað fyrir aukinni þjónustu og fögnum því mjög ákvörðun ráðuneytisins. Í Drafnarhúsi eru í dag 22 einstaklingar í sérhæfðri þjálfun og tómstund sem er þessum hópi og aðstandendum þeirra afar mikilvæg. Nú er hægt að þjónusta 12 einstaklinga til viðbótar og vonandi enn fleiri þegar fram líða stundir. Mikill skortur er á dagdvalarrýmum fyrir fólk með heilabilun og brýn þörf á aukinni þjónustu sem eykur lífsgæði einstaklinganna“ segir Rósa Guðbjartsdóttir bæjarstjóri Hafnarfjarðar. 

Í Hafnarfirði hefur verið rekin sértæk dagdvöl fyrir fólk með heilabilun frá árinu 2006 í Drafnarhúsi. Hafnarfjarðarbær hefur lagt rekstrinum til húsnæði en reksturinn hefur verið á hendi Alzheimersamtakanna. Í Drafnarhúsi er aðstaða fyrir 22 einstaklinga. Með heimildinni sem ráðherra veitti Hafnarfjarðarbæ í dag verða sérhæfð dagdvalarrými fyrir heilabilaða samtals 34 í bæjarfélaginu.

Drög að stefnu í málefnum einstaklinga með heilabilun voru birt til umsagnar í samráðsgátt stjórnvalda 24. júní síðastliðinn og rennur umsagnarfrestur út 1. september næstkomandi.

· Drög að stefnu í málefnum einstaklinga með heilabilun í samráðsgáttinni