Vegna netárásar á Strætó

Tilkynning til notenda akstursþjónustu um öryggisbrest í kerfum Strætó

Líkt og komið hefur fram í fjölmiðlum varð Strætó fyrir fjandsamlegri netárás frá erlendum árásaraðilum í lok desember sem náðu að brjóta sér leið inn í kerfi Strætó og afrita gögn og upplýsingar sem þar eru að finna. Komið hefur í ljós að árásaraðilarnir komust yfir kerfi Strætó sem hýsir gögn er tengjast akstursþjónustu sem Strætó hefur sinnt fyrir hönd tilgreindra sveitarfélaga á tímabilinu 2014-2021. Er tilkynning þessi unnin í samvinnu við Garðabæ, Hafnarfjarðarbæ, Kópavogsbæ, Mosfellsbæ, Reykjavíkurborg og Seltjarnarbesbæ. Persónuvernd hefur verið tilkynnt um málið og hafa sveitarfélögin og Strætó verið í samskiptum við stofnunina vegna þessa og haldið henni upplýstri.

Rannsókn málsins stendur enn yfir

Á vef Strætó má lesa ítarlega tilkynningu um málið en þar segir meðal annars að gripið hafi verið til umfangsmikilla ráðstafana til að loka á aðgang umræddra aðila og takmarka áhrif á þá einstaklinga sem Strætó vinnur upplýsingar um. Ekkert bendir til þess að árásaraðilarnir hafi eða geti misnotað þessar upplýsingar, en ekki sé hægt að útiloka að upplýsingarnar verði birtar opinberlega af hálfu umræddra aðila.  

Fylgst er náið með framvindu málsins á vettvangi Hafnarfjarðarbæjar.  Nánari upplýsingar um öryggisbrestinn veitir persónuverndarfulltrúi Strætó, Sigurður Már Eggertsson, í gegnum netfangið personuvernd@straeto.is. Einnig er hægt að hafa samband við þjónustuver Hafnarfjarðarbæjar í gegnum netfangið: hafnarfjordur@hafnarfjordur.is og síma: 585-5500.

Ljósmynd: Strætó (straeto.is)