Veiði og fiskrækt í Kleifarvatni

Endurnýjaður hefur verið samningur við Stangaveiðifélag Hafnarfjarðar um veiði og fiskirækt í Kleifarvatni. Samningurinn, sem nú er til sex ára, felur áfram í sér einkarétt til veiða og fiskiræktar í vatninu. Stangaveiðifélaginu er heimilt að selja félagsmönnum og öðrum veiðileyfi í Kleifarvatni.

Stangaveiðifélag Hafnarfjarðar er félag með langa hefð, en félagið var stofnað í kringum veiði í Hlíðarvatni í desember árið 1951. Fljótlega hófst einnig fiskirækt i Kleifarvatni og seinna sömuleiðis í Djúpavatni. Innan félagsins eru um 280 virkir félagar og heldur félagið uppi öflugu vetrarstarfi einu sinni í viku frá  janúarbyrjun og fram í lok apríl. Á þessu tímabili stendur félagið fyrir kastnámskeiðum og hnýtingarnámskeiðum í samvinnu við Námsflokka Hafnarfjarðar og Kastklúbb Reykjavíkur. Opið hús er á hverju fimmtudagskvöldi og einu sinni til tvisvar í mánuði koma gestir með fyrirlestur og fræðslu um veiðitengd málefni. Allir eru velkomnir á opin hús. Þá hefur félagið haldið úti unglingastarfi fyrir börn og unglinga á aldrinum 11 – 16 ára í nokkur ár. Krakkarnir koma saman í 8-10 skipti, læra á hnýta hnúta og flugur, horfa á veiðivídeó, fara yfir búnaðinn og enda svo í veiðiferð þar sem gist er eina nótt. Þetta starf er ókeypis fyrir krakkana.

Félagið leggur áherslu á að bjóða félagsmönnum fjölskylduvæn veiðisvæði á hagstæðu verði, og hvetur veiðimenn til að ganga vel um veiðisvæði og bera virðingu fyrir bráðinni.

Sjá nánar á heimasíðu félagsins