Velkomin í jólaævintýralandið í Hellisgerði

Sannkallað jólaævintýraland er risið í Hellisgerði, þessum nær 100 ára gamla og gullfallega lystigarði Hafnfirðinga í miðbæ Hafnarfjarðar. Við inngang í Hellisgerði frá Reykjavíkurvegi er nú búið að reisa stórt rautt jólahjarta og síðan tekur við ævintýraveröld ljósa og lystisemda. Ljósaseríur og ljósafígúrur sem gleðja augað og andann. Hjónin og Hafnfirðingarnir Jóhanna Guðrún og Davíð Sigurgeirsson sáu um að „opna“ jólaævintýralandið með fallegu jólalagi í upphafi vikunnar og fengu gestir garðsins á þeim tímapunkti að njóta. 

^{Hjónin Jóhanna Guðrún og Davíð Sigurgeirsson tóku lagið fyrir gesti og gangandi í upphafi vikunnar .}

Aðlaðandi garður til útivistar og samveru með „jólakúlunni“

Á þessari óvenjulegu aðventu þar sem engir opnir viðburðir eða skipulögð dagskrá er í boði þá var ákveðið að færa og framlengja jólaanda, jólabirtu og jólagleði jólabæjarins og Jólaþorpsins í Hafnarfirði yfir í Hellisgerði. Þannig vildu bæjaryfirvöld og starfsfólk finna leið til að skapa öðruvísi og einstaka upplifun og aðlaðandi vettvang til útivistar og samveru með nánustu fjölskyldunni eða „jólakúlunni“ eins og þríeykið segir. Hönnun og hugmyndavinna hófst í nóvember og fékk hópurinn listamanninn og Hafnfirðinginn Anthony Bacigalupo, sem fæddur er og uppalinn í Kaliforníu, til liðs við sig og hefur hópurinn ásamt öðrum fagaðilum unnið að uppsetningu síðustu daga og vikur.

^{Sannkallað jólaævintýraland er risið í Hellisgerði.  Fjölmargir starfsmenn sveitarfélagsins hafa komið að hönnun og uppsetningu með aðstoð ráðgjafa og annarra fagaðila. Samstarf sem er að skila frábærum afrakstri.} 

^{Hér má sjá bæjarstjóra Hafnarfjarðar, Rósu Guðbjartsdóttur, með listaparinu Jóhönnu og Davíð og Anthony Bacigalupo sem kom að verkefninu sem ráðgjafi.}  

Kjörinn garður fyrir nestisferð með kakó og kökur

Það er óhætt að segja að framkvæmdin sé að vekja verðskuldaða athygli og ánægju og hefur umferð um garðinn verið mikil það sem af er desembermánuði og þá ekki síst síðustu daga. Mikið af fólki leggur leið sína um garðinn á göngu sinni um jólabæinn auk þess sem sjá má fjölskyldur í nestisferð með kakó og jólakökur, börn við létt hraunklifur og hellaskoðun og við það að skauta á tjörninni sem er liggur í botni garðsins. Einhverjir hafa verið í ævintýraferð og í leit að álfum og huldufólki enda segir sagan að þar búi mikill fjöldi álfa og huldufólks. . Álfabúðin í Hellisgerði er opin allar aðventuhelgarnar frá kl. 12-17 en þar er hægt að versla fallegt handverk og hönnun og gæða sér á álfakakói og piparkökum. Þessi gullfallegi garður hefur að geyma margar sögurnar og minningarnar fyrir Hafnfirðinga og vini Hafnarfjarðar og mun án efa skapa nýjar og góðar minningar þessa aðventuna.

^{Álfabúðin í Hellisgerði er opin um helgar allar aðventuna frá kl. 12-17. Grímuskylda er í búðinni.} 

Garðurinn okkar allra

Hellisgerði er garður og sameign allra Hafnfirðinga og vonir standa til þess að allir taki virkan þátt í að vernda og passa upp á þessa fallegu náttúruperlu og þá líka þá ljósadýrð sem opin er öllum þessa jólahátíðina. Securitas mun jafnframt aðstoða Hafnfirðinga við vöktun. Gestir eru beðnir um að huga vel að öllum sóttvörnum í garðinum (sem og á öðrum ferðum sínum um jólabæinn)  og nota grímur ef ekki reynist unnt að viðhalda 2 metra fjarlægð.

Taktu þátt í laufléttum og snjöllum ratleik um Hellisgerði.