Vetrarfrí í Hafnarfirði

Vetrarfrí er í grunnskólum Hafnarfjarðar mánudaginn og þriðjudaginn 22.-23. febrúar og víðar um land og sameiginlegur skipulagsdagur 24. febrúar. Af því tilefni er m.a. frítt í sund fyrir börn og fullorðna þessa daga í Ásvallalaug, Suðurbæjarlaug og Sundhöll Hafnarfjarðar.

Heilsubærinn Hafnarfjörður býður börnum og fjölskyldum þeirra að taka þátt skemmtilegu bingói í vetrarfríinu en þar eru hugmyndir að góðri afþreyingu fyrir alla fjölskylduna og litli ratleikur Hafnarfjarðar 2021 leiðir þátttakendur á 15 nýja áhugaverða staði sem m.a. vekja athygli á sögu bæjarins. Þá hefur Brettafélag Hafnarfjarðar sett upp æfingabraut úr plasti í brekkuna á Víðistaðatúni.

Grunnskólabörn eru boðin sérstaklega velkomin í Bókasafn Hafnarfjarðar í vetrarfríinu, en þar verður staðið fyrir ratleik um safnið, sem hefur nýlega gengist undir yfirhalningu, svo það er ekki seinna vænna en að læra á nýja bókavölundarhúsið! Vinningar eru að sjálfsögðu í boði fyrir skörp lið sem ná að klára, og dregið verður úr innsendum svörum miðvikudaginn 24. febrúar. Leikar hefjast á laugardeginum 20. febrúar. Mánudaginn 22. febrúar fer einnig upp verkefnið ‘Bókakjóllinn’, þar sem gestum og gangandi gefst færi á að deila með okkur sínum uppáhaldsbókum, ljóðum, höfundum, tilvitnunum, ja, eða bara hverju sem er, og hanna með okkur tískuundur sem verður aðgengilegt og til sýnis á fyrstu hæð.

Á Byggðasafni Hafnarfjarðar verður hægt að taka þátt í skemmtilegum og fróðlegum ratleik fyrir fjölskylduna sem leiðir gesti um safnið og Hafnarborg býður grunnskólabörnum að koma og taka þátt í skemmtilegum og skapandi listasmiðjum á vegum safnsins.

Laugardagur 20. febrúar

• Ratleikur hefst um Bókasafn Hafnarfjarðar kl. 11. Opið til kl. 15.
• Byggðasafn Hafnarfjarðar opið kl. 11-17. Ratleikur og áhugaverðar sýningar.
• Sýningarnar Hafnarfjörður, verk úr safneign, og Það sem fyrir augu ber, sýning á verkum Gunnars Hjaltasonar, í Hafnarborg. Opið kl. 12-17.

Sunnudagur 21. febrúar

• Byggðasafn Hafnarfjarðar opið 11-17. Ratleikur og áhugaverðar sýningar.
• Sýningarnar Hafnarfjörður, verk úr safneign, og Það sem fyrir augu ber, sýning á verkum Gunnars Hjaltasonar, í Hafnarborg. Opið kl. 12-17.

Mánudagur 22. febrúar

• Kl. 6:30-22 FRÍTT Í SUND í Ásvallalaug, Suðurbæjarlaug og Sundhöll (til kl. 21)
• Bókakjóllinn fer upp á Bókasafni Hafnarfjarðar kl. 10
• Borðspilapop-up í fjölnotasal Bókasafns Hafnarfjarðar
• Byggðasafn Hafnarfjarðar opið kl. 11-17. Ratleikur og áhugaverðar sýningar.
• Prent-listasmiðja í Hafnarborg kl. 13-15. Notast verður við gel-plötur við prentun grafíkverka.

Þriðjudagur 23. febrúar

• Kl. 6:30-22 FRÍTT Í SUND í Ásvallalaug, Suðurbæjarlaug og Sundhöll (til kl. 21)
• Skúlptúragerð í Hafnarborg kl. 13-15. Stór og smá, þrívíð listaverk verða til úr fjölbreyttum efnivið.
• Sögustund fyrir yngri krakka – Bókasafn Hafnarfjarðar – 14-14:30
• Sögustund fyrir eldri krakka – Bókasafn Hafnarfjarðar kl. 15-15:30
• Tónleikar með Fjöru – Bókasafn Hafnarfjarðar kl. 17-17:30
• Byggðasafn Hafnarfjarðar opið 11-17. Ratleikur og áhugaverðar sýningar.

Miðvikudagur 24. febrúar

• Kl. 6:30-22 FRÍTT Í SUND í Ásvallalaug, Suðurbæjarlaug og Sundhöll (til kl. 21)
• Krakkaljóð og kósí (Komið með teppi!) – Bókasafn Hafnarfjarðar kl. 12-13
• Dregið í ratleik – Bókasafn Hafnarfjarðar kl. 14

Þá hefur heilsubærinn Hafnarfjörður tekið saman heilt stafróf af hugmyndum að fjölmörgu spennandi og skemmtilegu sem fólk getur tekið sér fyrir hendur heimavið eða í næsta nágrenni. Þar er hægt að nálgast fullt af hugmyndum að einhverju nýju og öðruvísi að gera einn eða með fjölskyldunni. Hér á vefnum er einnig hægt að nálgast lista yfir sérstæð náttúrufyrirbrigði og áhugaverða staði og fjölda göngu- og hjólaleiða sem liggja um Hafnarfjörð.

Heilsubærinn Hafnarfjörður óskar íbúum og vinum Hafnarfjarðar gleðilegs vetrarfrís!