Víðistaðaskóli fagnar 50 ára afmæli!

Víðistaðaskóli fagnar í dag 50 ára afmæli skólans en skólinn var stofnaður þann 16. september 1970 sem var fyrsti skóladagur nemenda í nýjum heimaskóla fyrir nemendur í norðurbæ og vesturbæ Hafnarfjarðar. Víðistaðaskóli var þá þriðji grunnskóli Hafnarfjarðar og var fyrsta foreldrafélag við grunnskóla í Hafnarfirði stofnað við skólann. Undir venjulegum kringumstæðum hefði afmælishátíðin verið opin foreldrum, vinum og velunnurum skólans en í ljósi takmarkana og tilmæla yfirvalda vegna Covid19 þá sjá nemendur og starfsfólk um að fagna á stórafmælinu með skemmtilegri dagskrá.

Ábyrgð, virðing og vinátta eru leiðarljós skólans

Víðistaðaskóli er heildstæður grunnskóli með nemendur í 1. – 10. bekk. Víðistaðaskóli hefur lagt sérstaka áherslu á að efla heilsu og líðan starfsfólks og nemenda undir merkjum heilsueflandi skóla ásamt því að vinna að öflugri umhverfis vernd og mennt og því til merkis þá fær Víðistaðaskóli á 50 ára afmælisdegi sínum Grænfánann afhentan fimmta sinn. List-og verkgreinum hefur alltaf verið haldið á lofti í skólanum og áhersla lögð á nemendalýðræði og fjölbreytileika.

Skólinn hefur vaxið og dafnað líkt og nemendur skólans

Í kringum 1980 var Víðistaðaskóli fjölmennasti skóli á Íslandi með 1232 nemendur þegar mest var og var skólinn tví- til þrísetinn. Á þeim rúmlega 45 árum sem skólinn hefur starfað hefur húsnæðið tekið miklum breytingum. Hann var byggður í þremur áföngum og haustið 2005 var nýjasti hluti skólans tekinn í notkun. Við skólann hafa starfað fjórir skólastjórar. Fyrsti skólastjórinn var Hörður Zophaníasson sem var starfandi skólastjóri í 22 ár. Við starfinu tók Eggert Leví og starfaði í tæp tvö ár en þá tók Sigurður Björgvinsson við skólastjórastarfinu og sinnti því í 19 ár. Hrönn Bergþórsdóttir er núverandi skólastjóri Víðistaðaskóla og hefur starfað frá árinu 2013. Fjölmargir hafnfirskir nemendur eiga góðar minningar frá skólagöngu sinni í skólanum. Skólinn hefur vaxið og dafnað líkt og nemendurnir og bera viðbyggingar skólans þess augljós merki í takt við aukinn fjölda íbúa að ógleymdum þeim 10 árum sem skólinn sameinaðist Engidalsskóli og Víðistaðaskóli frá 2010-2020.

^{Sigurður Björgvinsson, fyrrum skólastjóri Víðistaðaskóla, og Hrönn Bergþórsdóttir, núverandi skólastjóri}

Skólastarf sem einkennist af starfsgleði og sköpun

Við skólann starfa rúmlega 120 starfsmenn. Skólastarf Víðistaðaskóla einkennist af starfsgleði og sköpun hvort heldur er í skólastofunni, frístundaheimilinu eða félagsmiðstöðinni. Verkefni eins og árleg söngleikjasýning 10. bekkinga í Víðistaðaskóla, sem hefur getið sér góðan róm, skólaþing nemenda unglingadeildar þar sem áhersla á lýðræði nemenda er gerð skil og ekki síst verkefnið Veröld sem sérstaklega miðað að tvítyngdum nemendum eru aðeins brot af því frjóa skólastarfi sem á sér stað í skólanum. Skólinn er staðsettur í einstöku umhverfi, umlukinn hrauni og fjölbreyttri náttúru sem bærinn okkar er þekktur fyrir. Svæðið hentar því einstaklega vel til útivistar og eflingu umhverfisvitundar og því engin furða að skólinn sé á grænni grein.

Hamingjuóskir með hálfrar aldar afmæli Víðistaðaskóla Hafnfirðingar, starfsfólk og nemendur í fortíð, nútíð og framtíð!