Viljayfirlýsing um rannsóknir og nýtingu í Krýsuvík

Krýsuvík er verðmætt útivistar og ferðamannasvæði í eigu Hafnarfjarðarbæjar

Hafnarfjarðarbæjar og HS-Orka hafa undirritað viljayfirlýsingu um rannsóknir og nýtingu ferskvatns og jarðhita í Krýsuvík. Viljayfirlýsingin var samþykkt samhljóða á fundi bæjarstjórnar Hafnarfjarðar þann 27. september síðastliðinn. Hafnarfjarðarbær er eigandi Krýsuvíkur sem er verðmætt útivistar- og ferðamannasvæði og býr auk þess yfir einum vænlegasta kosti sem til er til framtíðaruppbyggingar hitaveitu á höfuðborgarsvæðinu og styrkingar á afhendingaröryggi hennar.

^{Tómas Már Sigurðsson forstjóri HS Orku og Rósa Guðbjartsdóttir bæjarstjóri Hafnarfjarðar við undirritun viljayfirlýsingar.}

„Það eru mikil tækifæri fólgin í áframhaldandi samstarfi og samhliða í eflingu rannsókna og nýtingar á svæðinu. Þar vegur þyngst afhendingaröryggi heits vatns á höfuðborgarsvæðinu, uppbygging innviða til útivistar og vistvænnar ferðaþjónustu og fjölbreyttir möguleikar til atvinnuuppbyggingar. Í viljayfirlýsingunni sem nú hefur verið undirrituð er lögð áhersla á að náttúrusérkenni og menningarminjar í Krýsuvík njóti sín sem best og að aðstaða á svæðinu verði bætt og umhverfið fegrað“ segir Rósa Guðbjartsdóttir bæjarstjóri Hafnarfjarðar.

^{Krýsuvík er verðmætt útivistar og ferðamannasvæði í eigu Hafnarfjarðarbæjar}

Mikilvægt að halda áfram samstarfi um rannsóknir og hugsanlega nýtingu auðlinda

HS Orka hf. rekur tvö orkuver á Reykjanesi þar sem fyrirtækið hefur yfir fjögurra áratuga reynslu af uppbyggingu á fjölnýtingu auðlindastrauma í Auðlindagarði HS Orku sem nýttir eru til grænna orkulausna, ræktunar, eldis og matvælaiðnaðar auk ferðamennsku. Auk þess aflar HS Orka ferskvatns og framleiðir heitt vatn og rafmagn fyrir veitur sveitarfélaga á Suðurnesjum. HS Orka hf hefur rannsóknarleyfi Orkustofnunar í Krýsuvík til 31. október 2025 og starfar samkvæmt samstarfsyfirlýsingu við Hafnarfjarðarbæ frá árinu 2006. Aðilar telja mikilvægt að halda áfram samstarfi um rannsóknir og hugsanlega nýtingu auðlinda í landi Krýsuvíkur án þess þó að það komi niður á náttúru eða aðdráttarafli svæðisins sem útivistar- og ferðamannasvæði. Komið verður á sérstökum Nýtingarsamningi um heimild til rannsókna og nýtingar auðlindaréttinda í Krýsuvík. Aðilar munu kappkosta að koma á samningi á sem fyrst en hann er forsenda þess að djúp rannsóknarhola verði boruð til staðfestingar nýtanlegrar jarðhitaauðlindar í Krýsuvík. Borunin er áformuð á árinu 2023 og er í forgrunni rannsóknaráætlunar. Viljayfirlýsing gildir til loka rannsóknartímabils, 31. október 2025, eða skv. samkomulagi aðila.