Störf við Vinnuskóla Hafnarfjarðar hefjast 11. júní

Sumarið 2019 fá 14 – 16 ára unglingar (fæddir árin 2003 – 2005) vinnu við Vinnuskóla Hafnarfjarðar.  Allir aldurshópar hefja vinnu 11. júní. Miðbæjarhópur, sem samanstendur af eldri ungmennum, hefur þegar hafið störf en öll 17 ára ungmenni fengu starf við vinnuskólann í sumar. 14 ára unglingar vinna aðra hverja viku fyrir hádegi og eftir hádegi hina, mánudaga til fimmtudaga. Lokað er á föstudögum. Fyrir hádegi er unnið frá 9– 12 og eftir hádegi frá 13 – 16. 15 og 16 ára unglingar hafa breytilegan vinnutíma. 14 ára unglingar vinna 79 tíma í sumar, 15 ára unglingar 101 tíma og 16 ára unglingar fá 123 tíma.

Verkefni Vinnuskóla Hafnarfjarðar

Vinnuskólinn sinnir fyrst og fremst umhverfismálum og á þannig stóran þátt í því að hreinsa bæinn eftir snjóþungan vetur og hirða gróður, götur og göngustíga yfir sumartímann. Starfsfólk Vinnuskólans sinnir því mikilvægu hlutverki í því að skapa vænta ásýnd bæjarins, að hann sé þrifalegur og snyrtilegur á að líta og ekki síst skemmtilegur fyrir íbúa og ferðamenn sem sækja bæinn heim í auknum mæli.

Laun
16 ára unglingar eru með 835 kr. á tímann og orlof þar ofan á. Mjög brýnt er að 16 ára unglingar láti vita hvort þau ætli að nýta skattkortið sitt svo ekki verði tekinn af þeim skattur. 15 ára unglingar verða með 627 kr. á tímann og orlof þar ofan á. 14 ára unglingar verða með 555 kr. á tímann og orlof þar ofan á. Orlof (10,17%) er borgað út hjá öllum aldurshópum.

Reglur Vinnuskóla Hafnarfjarðar gilda jafnt á vinnutíma sem og við félagsstörf á vegum skólans:

1. Flokksstjóri er verkstjóri á vinnustað. Næsti yfirmaður hans er yfirflokksstjóri
2. Öllu starfsfólki ber að vera vinnusamt, stundvíst, heiðarlegt og kurteist
3. Veikindi og önnur forföll ber að tilkynna hið fyrsta til skrifstofu Vinnuskólans af forráðamönnum
4. Notkun tóbaks er bönnuð. Sama gildir um áfengi og önnur vímuefni
5. Sjoppu- og búðarferðir eru ekki leyfðar á vinnutíma, þ.m.t. kaffitíma
6. Starfsmönnum ber að ganga vel og þrifalega um á vinnustað og fara vel með þau áhöld sem notuð eru
7. Starfsmenn bera viðeigandi kostnað ef þeir fremja skemmdarverk á eigum Vinnuskólans og annarra
8. Í kaffitímum er ætlast til að starfsfólk hafi hollt og gott nesti. Ekki er leyfilegt að vera með orku- og gosdrykki
9. Notkun farsíma er ekki leyfileg á vinnutíma. Sama gildir um Ipod/Mp3 nema flokkstjóri gefi leyfi um annað
10. Allir starfsmenn útvega sjálfir hlífðarfatnað og bera starfsmenn ábyrgð á eigin fötum og eigum

Skrifstofa Vinnuskólans er í gamla hjálparsveitahúsinu að Hrauntungu 5. Skrifstofan er opin frá kl. 8 – 16. Sími Vinnuskólans er 565-1899 og netfangið vinnuskoli@hafnarfjordur.is

Nánari upplýsingar um Vinnuskóla Hafnarfjarðar er að finna hér