Yfir 600 börn skoða þemakassa Bókasafnsins

Þemakassi bókasafnsins um sjávarlíf tekur stakkaskiptum!

Krossfiskar, kvarnir og kúfskel fylgdu Hugrúnu Margréti, deildarstjóra barna- og ungmennadeildar Bókasafns Hafnarfjarðar, heim á bókasafnið eftir heimsókn í Hafró. Fjársjóðnum var safnað af starfsfólki Hafrannsóknarstofnunar og þurrkaður í leiðöngrum þeirra um landhelgina. Munirnir verða í einum þriggja þemakassa bókasafnsins.

600 börn sjá þemakassana

„Já, börnin elska kassana, þar sem fræði og skáldskap er blandað saman,“ segir Hugrún en yfir sex hundruð leikskólabörn eru skráð til leiks að skoða þemakassana þrjá þennan skólavetur og hafa um 300 þegar séð ofan í kassa frá því í september. Þeir hafa slegið í gegn.

Einn er um skordýr, annar um líf á landi og þessi, sem nú verður enn veglegri, um sjávarlíf. Munir frá Náttúrufræðistofnun Kópavogs prýða hina kassana tvo.

„Það er mikils virði að fá nú þessar gjafir frá Hafró,“ segir Hugrún. Meðal nýju hlutanna í kassanum er stór skel, drottningasnigill, sem amma Jónasar Páls Jónassonar sviðstjóra hjá Hafró hafði með sér — líklegast frá Bahamas í Kyrrahafi. Skelin ómar hún þegar lögð er að eyra. Jónas segir frá því að áður en hún endaði hjá Hafró hafi hún prýtt blómabeð ömmu hans. Aðrir munir, eins og marflækjan, komu úr leiðöngrum starfsfólks Hafró.

Dóra, Hugrún, Jónas og Steinunn með með marflækjuna í heimsókn Hugrúnar til Hafró.

Nú leiða starfsmenn Hugrúnu um gullfallegt Hafró húsið á hafnarbakka hjarta Hafnarfjarðarbæjar og draga fram fígúrur hafsins úr hillum. „Við söfnum ekki sjávardýrum kerfisbundið heldur eru þetta hlutir sem einhverjir hafa tekið með sér úr leiðöngrum,“ segir Jónas. „Já, við megum missa nokkra hluti því við fáum nýja á næstu árum.“ Starfsmenn spyrja hvað Hugrún vilji í kassann.

„Krossfisk,“ svarar hún um hæl og biður um ráðleggingar um sniðuga muni. Krossfiskar, nornakrabbar, þyrnikórallar, gimburskel og áttstrendingur eru meðal muna í hillum Hafró. Þemakassinn um sjávarlíf bólgnar nú út.

Hugrún Margrét með geitungabú úr þemakassanum um skordýr. Þessi þemakassi hefur verið sá vinsælasti hingað til en fær nú harða samkeppni frá sjávarlífinu.

Þemakassarnir vinsælir

Þemakassar hafa vakið mikla athygli í vetur. Vinsælastur hingað til er skordýrakassinn. Þar sjá börnin geitungabú, sýni af bjöllum og flugum sem hafa flakkað til Íslands með matvælum. Við það að skoða kassann velta börnin til að mynda alls konar lífi á jörðinni fyrir sér með eða án skordýra fyrir sér. Í öllum þemakössunum eru svo bækur, bæði fræðibækur og skáldsögur, sem endurspegla viðfangsefni þeirra.

„Þetta er rosalega skemmtilegt verkefni. Það gefur ómetanlega tengingu við krakkana og kennarar á þeirra heimavelli. Það er ótrúlega dýrmætt að hitta krakkana og heyra hvað þau vita,“ segir Hugrún um þemakassa Bókasafns Hafnarfjarðar.

Hægt er að bóka Hugrúnu með kassana í heimsókn á leikskóla bæjarins.