Áshamar verður 19. leikskólinn og fyrir 120 börn

120 börn verða á Áshamri

Hafnarfjarðarbær og Framtíðar fólk ehf. hafa undirritað þjónustusamning um rekstur leikskólans Áshamars í Hafnarfirði. Leikskólinn verður sex deilda, staðsettur í jaðri Hamraneshverfis. Hann verður 19. leikskólinn í bæjarfélaginu. Þar er sérstök áhersla lögð á útikennslu í einstöku umhverfi.

„Við bætum enn þjónustuna með þessum glæsilega leikskóla í Hamarneshverfi og stöndum sterk um þessar mundir þegar litið er til leikskólamála,“ segir Valdimar Víðisson, bæjarstjóri. Leikskólinn mun rúma 120 börn.

„Við leggjum áherslu á fjölbreytileika í leikskólum hér í Hafnarfirði. Hver leikskóli hefur sína sérstöðu, sama gildir um leikskólann Áshamar, þar sem útinám verður ein af lykiláherslunum,“ segir bæjarstjóri. Ritað var undir þjónustusamning við Framtíðar fólk ehf.  í dag, fimmtudag.

Leikskólabyggingin er öll hin glæsilegasta og aðstaða fyrir leikskólastarf eins og best verður á kosið. Það á bæði við um svæði sem helguð eru starfi með börnum og öll starfsmannaaðstaða. Leikskólinn við Áshamar verður 19. leikskólinn í Hafnarfirði. Tæplega 2000 leikskólabörn eru í bænum og mun skólinn rúma 120 þeirra.

Útikennsla eitt meginstefa

Guðrún Jóna Thorarensen, framkvæmdarstjóri Framtíðar fólks ehf., segir útikennslu verða eina af megináherslum skólans enda umhverfi skólans einstakt.

„Einnig sköpun, vellíðan barnanna og samvinna,“ segir hún. Samfélagið kalli á minni streitu, meiri ró. „Útikennsla er mjög góð til að hjálpa okkur að finna frið og ró.“

Guðrún, sem er menntaður leikskólakennari og með M.Ed. gráðu í stjórnun menntastofnana, segir að stundum sé talað um umhverfið sem þriðja kennarann í leikskólastarfinu. „Þarna er ekki hægt að segja annað en að umgjörðin öll verði eins og best verður á kosið.“ Hún hlakki til að taka við húsinu í lok febrúar og ráða inn starfsfólk.

Hönnun sem smellpassar starfseminni

Guðrún hefur starfað að leikskólamálum lengi, bæði hjá borginni og í Hjallastefnunni. Nú mun hún reka Áshamar.

„Það er gaman að sjá hvernig hönnun byggingarinnar endurspeglar umhverfið. Stórir gluggar og hurðir út af hverri deild. Hönnunin er ótrúlega flott hjá Hafnarfjarðarbæ,“ segir hún.

„Ég sem leikskólakennari skynja að þarna hefur komið fólk að hönnun skólans sem hefur mikla reynslu af því að vinna með börnum á leikskólaaldri. Deildirnar eru einstaklega rúmgóðar og þrjú herbergi innan hverrar deildar, mikil lofthæð og birta. Lögð er áhersla á að nota stóra glugga, þakglugga og gler,“ lýsir hún.

„Svo er öll vinnuaðstaða einstök. Tveir listaskálar fyrir börnin, salur með sviði. Allir kennarar fá gott pláss undir sérkennslu og viðtalsherbergi við foreldra. Þetta er allt upp á tíu.“

Draumur að rætast

Leikskólinn er byggður upp með Modules timbureiningum sem settar eru saman í verksmiðju við bestu aðstæður. Leikskólinn verður á einni hæð í L-laga formi um eitt miðsvæði sem mun halda utan um starfsemina og leikskólalóðina auk þess að mynda skjól.

Stefnt er að því að opna skólann 1. apríl og verður skólinn sá fyrsti sem Guðrún rekur sjálf. „Það gefur mikið frelsi að byggja starfið frá grunni og gaman að takast á við reksturinn sjálf. Já, nú er draumur að rætast.“

Já, við getum verið stolt af þessu glæsilega nýja leikskólahúsi!