Bæjarlistamaður 2022 er Bjössi Thor

Ekki bara einn þekktasti gítarleikari landsins heldur dáður um allan heim

Björn Thoroddsen, einn þekktasti og ástsælasti gítarleikari landsins, er bæjarlistamaður Hafnarfjarðar árið 2022. Hann hefur á sinn einlæga og fallega hátt stimplað sig inn í hug og hjörtu gítaráhugafólks um allan heim og auðgað menningarlíf æskubæjarins Hafnarfjarðar með viðburðum sínum. Björn, eða Bjössi Thor eins og hann er yfirleitt kallaður, hefur síðastliðna áratugi verið einn helsti jazztónlistarmaður landsins og hlotið ýmsar viðurkenningar sem slíkur. Hefð hefur skapast fyrir því að halda síðasta vetrardag hátíðlegan í Hafnarfirði með vali á bæjarlistamanni ársins.

Einn atkvæðamesti jazztónlistarmaður landsins

Björn var 11 ára þegar hann fór að læra á gítar, lærði klassískan gítarleik í Tónlistarskóla Sigursveins D. Kristinssonar og fór eftir það til náms við Guitar Institute of Technology í Hollywood og útskrifaðist þaðan árið 1982. Björn fór fljótt að semja og útsetja og vinnur jöfnum höndum að hljóðritunum og tónleikahaldi hérlendis sem erlendis og hefur leikið víða með hæfileikaríkustu gítarleikurum heims. Hann hefur gefið út yfir þrjátíu hljómplötur undir eigin nafni auk fjölda samstarfsverkefna og hefur tónlist hans verið gefin út víða erlendis. Hann hefur m.a. samið og útsett tónlist fyrir tríóið Guitar Islancio sem hefur vakið verðskuldaða athygli fyrir nýstárlegar útsetningar á þjóðlögum. Björn er ekki bara einn þekktasti gítarleikari landsins heldur er hann dáður um allan heim og hefur spilað tónlist sína víða og m.a. komið fram í Bandaríkjunum, Kanada, Rússlandi, Spáni, Þýskalandi, Englandi og víða á Norðurlöndum. Björn hefur hlotið ýmsar viðurkenningar fyrir störf sín á ferlinum. Árið 2003 var hann útnefndur „Jazztónlistarmaður ársins“, fyrstur íslenskra gítarleikara; Jazztónskáld ársins 2005, fékk viðurkenningu frá International Association for Jazz Education og hlaut gullmerki Félags íslenskra hljómlistarmanna fyrir framlag sitt til jazztónlistar árið 2011. Um þessar mundir eru 40 ár frá því að fyrsta sólóplatan hans „Svif“ kom út.

„Vorið og listin eiga ýmislegt sameiginlegt; meðal annars bjartsýni, grósku og kraft. Björn Thoroddsen er vor okkar Hafnfirðinga að þessu sinni; fullur af bjartsýni, grósku og krafti og hefur verið í marga áratugi. Björn hefur skilað sér aftur heim á æskuslóðirnar í hjarta Hafnarfjarðar og mun halda áfram að glæða menningarandann hér í Hafnarfirði lífi, tónum og töfrum. Björn er vítamínsprauta og unga fólkinu okkar mikil fyrirmynd bæði í orði og tónum,“ segir Rósa Guðbjartsdóttir bæjarstjóri Hafnarfjarðar um val á bæjarlistamanni Hafnarfjarðar 2022. Björn er uppalinn í Hafnarfirði og hefur komið sér vel fyrir í suðurbænum þangað sem hann bauð bæjarbúum heim á tónleika í garðinum á Björtum dögum sumarið 2021 og mun endurtaka leikinn í sumar.

Hátíðin komin heim til Hafnarfjarðar – þar sem hjarta Björns slær

Hafnfirðingar hafa fengið að njóta tónlistar Björns á heimavelli en tónlistarhátíðin Guitarama sem Björn hefur skipulagt um 15 ára skeið hefur verið haldin í Hafnarfirði undanfarin ár. Guitarama er alþjóðleg tónlistarhátíð þar sem gítarinn er í aðalhlutverki. Björn er gestgjafi hátíðarinnar og fær til sín á svið fjölbreytta flóru tónlistarfólks. Hátíðin er fræðandi, uppbyggjandi og fyrir alla aldurshópa með virka tengingu við Tónlistarskóla Hafnarfjarðar og ungmennahúsið Hamarinn. Guitarama hefur farið víða og borið nöfn borga sem hátíðin hefur verið haldin í m.a Winnipeg, Bergen, Reykjavik, Chicago, Denver og Edmonton en nú er hátíðin komin heim í Hafnarfjörð þar sem hjarta Björns slær.

Þeir sem hlotið hafa nafnbótina bæjarlistamaður Hafnarfjarðar í gegnum árin eru:

• 2021 – Friðrik Dór Jónsson, tónlistarmaður
• 2020 – Bergrún Íris Sævarsdóttir, barnabókahöfundur og teiknari
• 2019 – Björk Jakobsdóttir, leikkona og leikstjóri
• 2018 – Björgvin Halldórsson, tónlistarmaður
• 2017 – Steingrímur Eyfjörð, myndlistarmaður
• Ekki voru útnefndir bæjarlistamenn á árunum 2015 til 2016
• 2014 – Andrés Þór Gunnlaugsson, tónlistarmaður
• Ekki voru útnefndir bæjarlistamenn á árunum 2010 til 2013
• 2009 – Jóhanna Guðrún Jónsdóttir, söngkona
• 2008 – Sigurður Sigurjónsson, leikari
• 2007 – Jónína Guðnadóttir, myndlistarmaður
• 2006 – Elín Ósk Óskarsdóttir, söngkona
• 2005 – Sigrún Guðjónsdóttir (Rúna), myndlistarmaður

Við val á bæjarlistamanni Hafnarfjarðar kallar menningar- og ferðamálanefnd eftir tilnefningum bæjarbúa og árlega berst mikill fjöldi þeirra enda hefur Hafnarförður stimplað sig inn sem vagga menningar og lista og er þekktur fyrir iðandi menningarlíf sem er drifið áfram af kraftmiklu listafólki þar sem einstaklingurinn sjálfur, framlag hans, sköpun og þátttaka spilar stærsta hlutverkið. Bæjarlistamaður fær 1,5 milljónir í viðurkenningarskyni til að vinna áfram að list sinni

Við óskum Bjössa Thor innilega til hamingju með titilinn með hjartans þökkum fyrir einlægt og fallegt framlag í þágu menningarlífsins í Hafnarfirði og heimssins alls! 

Ljósmyndir: Hulda Margrét